گرفتار PTI رہنما اعظم سواتی کے مزید جسمانی ریمانڈ کی استدعا پر فیصلہ محفوظ

پاکستان تحریکِ انصاف (پی ٹی آئی) کے گرفتار رہنما اعظم سواتی کے جسمانی ریمانڈ کے لیے درخواست پر عدالت نے فیصلہ محفوظ کر لیا، یہ محفوظ کیا گیا فیصلہ 10 منٹ میں سنایا جائے گا۔

ایف آئی اے کی جانب سے پاکستان تحریکِ انصاف (پی ٹی آئی) کے گرفتار رہنما اعظم سواتی کو عدالت میں پیش کر دیا گیا۔

اعظم سواتی کو 1 روز کا جسمانی ریمانڈ مکمل ہونے پر ڈیوٹی مجسٹریٹ شعیب اختر کی عدالت میں پیش کیا گیا ہے۔

پراسیکیوشن کے وکیل نے اعظم سواتی کا ٹوئٹ پڑھ کر عدالت میں سنایا جس کے بعد پراسیکیوٹر کی جانب سے عدالت سے اعظم سواتی کے 14 دن کے ریمانڈ کی استدعا کی گئی۔

دوسری جانب اعظم سواتی سے اظہارِ یک جہتی کے لیے پی ٹی آئی کے رہنما و سینیٹرز ڈسٹرکٹ کورٹ پہنچ گئے جن میں سابق وفاقی وزیر عمر ایوب خان، پی ٹی آئی سینیٹرز فوزیہ ارشد، فدا محمد خان اور سیف اللّٰہ ابڑو شامل ہیں۔

واضح رہے کہ متنازع ٹویٹ پر سینیٹر اعظم خان سواتی کے خلاف سائبرکرائم کا مقدمہ درج کیا گیا تھا جس کے بعد انہیں گرفتار کر لیا گیا تھا۔

عدالت نے گزشتہ روز اعظم سواتی کو ایک روز کے جسمانی ریمانڈ پر ایف آئی اے کے حوالے کیا تھا۔

بشکریہ جنگ