کین رچرڈسن دورۂ پاکستان سے باہر

آسٹریلوی فاسٹ بولر کین رچرڈسن دورۂ پاکستان سے باہر ہوگئے، جبکہ وائٹ بال اسکواڈ کے کھلاڑیوں نے میلبرن میں ٹریننگ شروع کر دی ہے۔

کرکٹ آسٹریلیا کا کہنا ہے کہ کین رچرڈسن انجری کے باعث دورے سے باہر ہوئے ہیں، وائٹ بال اسکواڈ میں بین ڈارشیوس کو ان کے متبادل کے طور پر شامل کر لیا گیا ہے۔

دوسری جانب کپتان آسٹریلیا وائٹ بال کرکٹ ٹیم ایرون فنچ کا کہنا ہے کہ ففٹی اوور کی کرکٹ کے لئے ردہم میں آنے کی کوشش کر رہے ہیں۔

انہوں نے کہا کہ ہم منتظر ہیں کہ اب وائٹ بال کرکٹ سیریز کھیلیں، ففٹی اوور کے ورلڈ کپ کا کمبی نیشن بنانے کے لئے کام کریں گے۔

ایرون فنچ نے کہا کہ اس وقت ہمارا ٹارگٹ یہی ہے کہ ہم جو سیریز کھیل رہے ہیں اس کو جیتیں، پاکستان ایک اچھی ٹیم ہے سیریز میں سخت مقابلہ ہوگا۔

آسٹریلوی کپتان کا کہنا تھا کہ ہمارے کھلاڑیوں نے زیادہ ٹی ٹوئنٹی کرکٹ کھیلی ہوئی ہے لیکن ون ڈے میں بھی اچھا کریں گے، کھلاڑی باصلاحیت ہیں انہیں خود پر اعتماد ہے کہ وہ اچھا کر سکتے ہیں۔

انہوں نے کہا کہ میں اب سو فیصد بہتر محسوس کر رہا ہوں اب مکمل فٹ ہوں اور ردہم میں آؤں گا، جب سب کھلاڑی دستیاب ہوں گے تو ہماری ون ڈے ٹیم بہت تجربہ کار ہو گی۔

فنچ کا مزید کہنا تھا کہ میرا اس وقت ٹارگٹ یہی ہے کہ میں ورلڈ کپ کھیلوں اور اس سے پہلے رنز کروں، میں آسٹریلیا کے لئے زیادہ سے زیادہ میچز جیتنا چاہتا ہوں۔

بشکریہ جنگ