کیلیفورنیا ہائی وے پر ٹماٹروں کی چٹنی بن گئی

امریکی ریاست کیلیفورنیا کے ہائی وے پر ٹماٹروں سے بھرا ٹرک دو گاڑیوں سے ٹکرا گیا جس کے نتیجے میں ٹماٹر سڑک پر بکھر گئے۔

نیویارک ٹائمز کی رپورٹ کے مطابق ڈیڑھ لاکھ سے زائد ٹماٹر ٹرک سے گرنے کے بعد 200 فٹ تک بکھر گئے اور پورے ہائی وے کو سرخ کردیا۔

یہ حادثہ پیر کی صبح 5 بجے کے قریب پیش آیا۔ سڑک پر سے گزرنے والی گاڑیوں کو نہیں معلوم ہوسکا کہ ٹماٹر بکھرے ہوئے ہیں اور وہ اس پر سفر کرتی رہیں۔

پولیس حکام نے کہا کہ ٹماٹر کچلنے سے سڑک پر پھسلن ہوگئی تھی جس سے 7 گاڑیاں آپس میں ٹکرا گئیں، ان حادثات میں تین افراد معمولی زخمی ہوئے جبکہ چوتھے کی ٹانگ ٹوٹ گئی۔

صورتحال کے پیش نظر ہائی وے کو بند کر دیا گیا تھا جسے صفائی کرکے کئی گھنٹوں بعد ٹریفک کے لیے کھولا گیا۔

خیال رہے کہ ریاست کیلیفورنیا میں امریکا کا 90 فیصد سے زائد ٹماٹر پیدا ہوتا ہے۔

بشکریہ جنگ