کیا پی ٹی آئی نے اسپیکر کے آفس کو یرغمال بنالیا ہے؟ ترجمان پنجاب حکومت

ترجمان پنجاب حکومت ملک محمد احمد خان نے کہا ہے کہ کیا پاکستان تحریک انصاف (پی ٹی آئی) نے اسپیکر کے آفس کو یرغمال بنالیا ہے؟

پنجاب اسمبلی کے باہر میڈیا سے گفتگو کرتے ہوئے ملک محمد احمد خان کا کہنا تھا کہ یہ کوئی سیاسی حق نہیں کہ آپ شاہراہوں کو بند کردیں۔

ان کا کہنا تھا کہ ہم نے آپ کے سامنے آ کر کوئی واویلا نہیں کیا، ہم نے کبھی آپ کے کسی بجٹ کو ایسے نہیں روکا۔

ملک محمد احمد خان نے کہا کہ ہم چادر اور چار دیواری کے تحفظ کے ضامن ہیں، ہماری بہن بیٹیوں کو جیلوں میں بند کیا جاتا رہا۔

انہوں نے کہا کہ ہمارے خلاف سیاسی مقدمات بنائے گئے، دوست محمد مزاری پر قاتلانہ حملہ کیا گیا۔

ان کا کہنا تھا کہ بجٹ پاس ہو جائے گا، اسی اسمبلی کے اراکین نے کرنا ہے، میری آپ سے درخواست ہے کہ معاملات کو درست سمت میں لے کر جائیں۔

ملک محمد احمد خان کا کہنا تھا کہ میں آپ کا معاملہ 12 کروڑ عوام پر چھوڑتا ہوں، ہم سب کچھ بالائے طاق رکھ کر ان کے بلانے پر ان کے چیمبر میں گئے۔

انہوں نے کہا کہ مقدمات سے متعلق میں نے کہا کہ حکومت پراسیکیوٹ نہیں کرے گی، ہمارا حق ہے کہ ہم اس بجٹ کو پاس کروائیں۔

بشکریہ جنگ