کہیں نہیں ہوتا کہ تحفہ سستا خریدیں اور مہنگا بیچ دیں، سعیدغنی

صوبائی وزیرِ اطلاعات سندھ سعید غنی کا کہنا ہے کہ عمران خان کے خلاف توشہ خانہ کیس کیوں نہیں بن سکتا، کہیں نہیں ہوتا کہ تحفہ سستا خریدیں اور مہنگا بیچیں۔

کراچی میں پریس کانفرنس کرتے ہوئے صوبائی وزیرِ اطلاعات سندھ سعید غنی نے کہا کہ نواز شریف، یوسف رضا گیلانی اور آصف زرداری پر توشہ خانہ کیس بن سکتا ہے، حالانکہ ان لوگوں میں سے تو کسی نے آج تک توشہ خانہ کی چیزوں کو بیچا نہیں۔

’’کیا عمران خان آسمان سے اترے ہیں؟‘‘

انہوں نے کہا کہ توشہ خانے پر نواز شریف، گیلانی اور زرداری پر کیس بن سکتا ہے تو کیا عمران خان آسمان سے اترے ہیں، عمران خان نے سستے تحفے خرید کر مہنگے بیچ دیے۔

وزیرِ اعظم میاں محمد شہباز شریف کا کہنا ہے کہ میں کنفرم کر سکتا ہوں کہ سابق وزیرِ اعظم عمران خان نے توشہ خانے سے تحائف لے کر بیرونِ ملک بیچے۔

سعید غنی کا کہنا ہے کہ فارن فنڈنگ کیس 7 سال سے چل رہا ہے مگر اس پر کارروائی نہیں ہوئی، عمران خان لوگوں کو بتانا چاہ رہے ہیں کہ ان کے خلاف یہ کارروائیاں ہو رہی ہیں۔

انہوں نے کہا کہ پی ڈی ایم بنانے اور عدم اعتماد لانے میں پیپلز پارٹی کا کردار اہم ہے، عمران خان کے ٹولے کی کرپشن سامنے آئے گی تو لوگ کانوں کو ہاتھ لگائیں گے۔

’’فرح گوگی عمران گٹھ جوڑ سامنے آئے گا تو ہوش اُڑ جائیں گے‘‘

صوبائی وزیرِ اطلاعات سندھ کا کہنا ہے کہ فرح گوگی اور عمران گٹھ جوڑ سامنے آئے گا تو لوگوں کے ہوش اُڑ جائیں گے، تم نے کیس بنائے تھے، ثابت نہیں ہوئے تو کیا وہ انتقامی کارروائی نہیں تھی؟

ان کا کہنا ہے کہ پاکستانی قانون کے مطابق کوئی جماعت بیرونِ ملک سے فنڈنگ نہیں لے سکتی، تم نے فارن فنڈنگ کے پیسے سے پارٹی چلائی، الیکشن جیتا۔

’’عمران، صدر، اسپیکر، ڈپٹی اسپیکر نے آئین توڑا‘‘

سعید غنی نے کہا کہ عمران خان، اسپیکر، ڈپٹی اسپیکر و صدرِ پاکستان نے آئین کو توڑا ہے، کل پنجاب اسمبلی میں غیر متعلقہ افراد کو ایوان میں لایا گیا۔

انہوں نے کہا کہ آٹا، چینی، ادویات کے کئی اسکینڈلز سامنے آئے ہیں، ہم عمران خان کو غدرای کے سرٹیفکیٹ تقسیم کرنے نہیں دیں گے، وقت ثابت کرے گا کہ ڈاکٹر اسرار و حکیم سعید نے درست پیش گوئی کی، آئین شکن سے بڑا کوئی ملک دشمن نہیں ہوتا، عمران خان نے عدالتی حکم ماننے سے انکار کیا تھا۔

’’ کل یہ بتاتے کہ انہوں نے کراچی کیلئے کوئی منصوبہ شروع کیا تھا‘‘

وزیرِ اطلاعات سندھ نے کہا کہ پی ٹی آئی کے پاس کراچی کے کئی ایم این اے اور ایم پی اے ہیں، کل یہ بتاتے کہ ان کی حکومت نے کراچی کے لیے کوئی منصوبہ شروع کیا، کراچی کے لوگوں کو گیس کی لوڈ شیڈنگ کا بھی سامنا ہے، ہم اس سے قبل کئی بار باغِ جناح کو بھر چکے ہیں۔

’’شیخ رشید جھوٹ ڈھٹائی سے بولتے ہیں‘‘

ان کا کہنا ہے کہ شیخ رشید جھوٹ ڈھٹائی سے بولتے ہیں، ان کی کوئی ایک بات درست ثابت نہیں ہوتی، عمران اسماعیل نے شہر بند کرنے کی دھمکی دی، وہ وقت گزر گیا جب شہر بند ہوتا تھا، شہر تو نہیں مگر ان کی روٹی روزی بند ہو جائے گی۔

’’جلسے میں خواتین سے بدتمیزی کرنے والے لفنگوں کیخلاف کارروائی ہو گی‘‘

سعید غنی نے کہا کہ عمران خان نے میڈیا پر پابندی لگوائی، اینکرز کو آف ایئر کروایا، یہ فاشسٹ ہیں، صحافیوں پر حملے کرتے ہیں، جلسے میں لفنگوں نے خواتین کے پورشن میں داخل ہو کر بدتمیزی کی، میری پولیس سے بات ہوئی ہے، ان لوگوں کی شناخت کر کے ان کے خلاف کارروائی کرنے کا کہا ہے۔

بشکریہ جنگ