کوہلی اور روہت سمیت کئی بھارتی کھلاڑی ریٹائرمنٹ کا سوچ سکتے ہیں، گواسکر

انگلینڈ کے محض دو بیٹرز کے ہاتھوں بدترین شکست کے بعد بھارت میں ٹیم کے کئی کھلاڑیوں سے متعلق ریٹائرمنٹ کی باتیں ہونے لگیں۔

ٹی ٹوئنٹی ورلڈ کپ کے سیمی فائنل میں 10 وکٹ سے شکست کے بعد بھارتی ٹیم کے سابق کپتان سنیل گواسکر نے کہا ہے کہ روہت شرما اور ویرات کوہلی ٹی ٹوئنٹی فارمیٹ سے ریٹائرمنٹ کا سوچ سکتے ہیں۔

سنیل گواسکر نے کہا ہے کہ ان دونوں کی غیر موجودگی میں ہاردک پانڈیا کو کپتان بنایا جا سکتا ہے۔

سنیل گواسکر کا کہنا ہے کہ بھارتی ٹیم کے چند کھلاڑی ریٹائرمنٹ کا اعلان بھی کرنے والے ہیں، ٹیم میں 30 سال کی عمر کے درمیان کے بہت سے کھلاڑی ایسے ہیں جو ٹیم میں اپنی پوزیشن پر غور کریں گے۔

بھارتی میڈیا کے مطابق سنیل گواسگر نے کہا ہے کہ ہاردک پانڈیا کی قیادت میں ایک مختلف بھارتی ٹیم نیوزی لینڈ کے دورے پر روانہ ہو گی۔

اس کے علاوہ سابق کھلاڑی اور تجزیہ کار بھی بھارتی ٹیم کو ٹی ٹوئنٹی ورلڈ کپ کے سیمی میں بدترین شکست پر تنقید کا نشانہ بنا رہے ہیں۔

واضح رہے کہ گزشتہ روز ٹی ٹوئنٹی ورلڈکپ کے دوسرے سیمی فائنل میں انگلینڈ نے بھارت کو 10 وکٹ سے شکست دی تھی۔

بشکریہ جنگ