کوئی طاقتور شخص کسی ملزم کو نہیں بچاسکے گا، ضیاء لانگو

مشیر داخلہ بلوچستان ضیاء لانگو نے کہا ہے کہ کوئی طاقتور شخص کسی ملزم کو نہیں بچاسکے گا، ظالموں کو انجام تک پہنچانا چاہتے ہیں، وڈیو اسکینڈل سے متعلق تحقیقات ابھی سامنے نہیں لاسکتے۔

ضیاء لانگو نے پریس کانفرنس کرتے ہوئے کہا کہ پولیس ذمہ دار ادارہ ہے، تمام شواہد محفوظ ہیں، ویڈیو اسکینڈل میں تفتیش کیلئے جس ادارہ کی ضرورت ہوگی مدد لیں گے۔

’حق دو گوادر کو‘ تحریک کے سربراہ مولانا ہدایت الرحمان اور صوبائی مشیر داخلہ بلوچستان ضیا اللہ لانگو آمنے سامنے آگئے۔

انہوں نے کہا کہ احتجاج عوام کا حق ہے، وہ اداروں سے تعاون کریں، گوادر احتجاج کا وزیر اعظم نے نوٹس لیا ہے، وزیر اعلیٰ نے بھی نوٹس لیا تھا، گوادر کے مظاہرین کے 19 مطالبات ہیں، 16 مطالبات پورے کرچکے ہیں۔

ان کا یہ بھی کہنا ہے کہ کچھ بوٹس کسٹم ایکٹ کے تحت پکڑی گئی ہیں، ایک مطالبہ ہے کہ بارڈر ایف سی سے لے کر سول ایڈمنسٹریشن کو دیں، اتنا بڑا بارڈر ہے، سول ایڈمنسٹریشن کے پاس ہونا چاہیے، ہم کوشش کررہے ہیں۔

مشیر داخلہ بلوچستان ضیا لانگو نے کہا ہے کہ ویڈیو اسکینڈل سامنے آتے ہی حکومتی مشینری حرکت میں آگئی تھی۔

مشیر داخلہ بلوچستان نے کہا کہ کوئٹہ اور بلوچستان بین الاقوامی دہشت گردی کا شکار ہے، ہمارے اداروں کی قربانی کی وجہ سے حالات بہتر ہیں۔

بشکریہ جنگ