کمراٹ میں پھنسے سیاحوں کو نکالنے کیلئے ہیلی کاپٹر فلائٹ نہیں کرسکتے، ایڈیشنل سیکریٹری

ایڈیشنل چیف سیکریٹری خیبر پختونخوا شہاب علی شاہ کا کہنا ہے کہ وادی کمراٹ میں پھنسے سیاحوں کی مدد کے لیے ہیلی کاپٹر وہاں موجود ہیں تاہم خراب موسم کے باعث فلائٹ نہیں کر سکتے۔

خیبر پختونخوا کے ضلع اپر دیر کی وادی کمراٹ میں پھنسے سیاحوں کی مدد کے حوالے سے ایڈیشنل چیف سیکریٹری شہاب علی شاہ کا موقف سامنے آگیا۔

شہاب علی شاہ نے کہا کہ جیسے ہی موسم بہتر ہوگا پھنسے ہوئے سیاحوں کو وہاں سے باحفاظت نکال لیا جائے گا۔

ایڈیشنل چیف سیکریڑی کے پی نے کہا کہ وادی کمراٹ میں پھنسے طلباء کو خوراک اور خیمے فراہم کیے گئے ہیں۔

خاتون سیاح نے بتایا کہ وہ اپر دیر میں سخت سردی سے نڈھال ہیں۔ گیلی زمین پر سو رہے ہیں، کھانے پینے کا کوئی انتظام نہیں ہے۔

واضح رہے کہ خیبر پختونخوا کے ضلع اپر دیر کی وادی کمراٹ میں 30 طلباء و طالبات پھنس کر رہ گئے۔

خاتون سیاح نے جیو نیوز کو بتایا ہے کہ دو دنوں سے جاری بارش اور سیلابی صورتحال کی وجہ سے وہ پھنس چکے ہیں، تمام طلباء و طالبات کا تعلق پنجاب کے مختلف علاقوں سے ہے۔

طالبہ نے بتایا کہ ہم دو دن سے مدد کے لیے مسلسل ویڈیوز اپ لوڈ کررہے ہیں مگر ہماری مدد کے لیے ابھی تک کوئی بھی نہیں پہنچا، کھانے پینے کی اشیاء بھی ختم ہوگئی ہیں اور ہم یہاں پر بے یار و مددگار موجود ہیں۔

بشکریہ جنگ