کل ڈپٹی اسپیکر کو جان سے مارنے کی کوشش کی گئی: عطاء تارڑ
مسلم لیگ ن کے رہنما عطاء اللّٰہ تارڑ کا کہنا ہے کہ گزشتہ روز ڈپٹی اسپیکر کو جان سے مارنے کی کوشش کی گئی، ان پر حملہ کیا گیا، بہیمانہ تشدد کیا گیا۔
’’آپ کا چہرہ متکبرانہ تھا، آپ نے تھمز اپ کیا‘‘
مسلم لیگ ن کے دیگر رہنماؤں کے ہمراہ پریس کانفرنس کرتے ہوئے انہوں نے کہا کہ آپ عدالتوں کا فیصلہ ماننے کو تیار نہیں ہیں، آپ نے اپنی نگرانی میں لوگوں کو اسمبلی میں داخل کرایا، چھلانگیں لگا کر آنے والے درجنوں لوگوں نے اپوزیشن پر حملہ کیا، اپوزیشن کو مار کرآپ کا چہرہ متکبرانہ تھا، آپ نے تھمز اپ کیا۔
’’جن ہاتھوں سے آپ نے بددُعا دی، انہی سے دعا کرائی تھی‘‘
عطاء اللّٰہ تارڑ نے کہا کہ ہم چیف منسٹری پلیٹ میں رکھ کر آپ کے لیے لائے تھے، جن ہاتھوں سے آپ نے بددُعا دی اسی ہاتھ سے دعا کرائی تھی، ہم آپ کے گھر وزارتِ اعلیٰ کی آفر لے کر گئے، آپ کے بیٹے نے کیوں برا سلوک کیا؟
’’فوٹیج میں پرویز الہٰی کہہ رہے ہیں نکلو اور حملہ کر دو‘‘
انہوں نے کہا کہ فوٹیج میں دیکھیں کہ پرویز الہٰی کہہ رہے ہیں کہ نکلو اور حملہ کر دو، پرویز الہٰی نے پرائیویٹ لوگوں سے حملہ کرایا، اپنی نگرانی میں حملہ کرنے کی کوشش کی، گجرات سے غنڈوں کو بلایا گیا، اس عمر میں بھی غلط بیانی کی۔
’’آکسیجن ماسک پہن کر، پائیو ڈین لگا کر ڈرامہ کیا گیا‘‘
ن لیگی رہنما نے کہا کہ چوہدری شجاعت ہمارے بڑے ہیں، ان کی دل سے عزت کرتے ہیں، کل چوہدری شجاعت کی عزت کو بھی خاک میں ملا دیا گیا، آکسیجن ماسک پہن کر اور پائیو ڈین لگا کر آپ نے ڈرامہ کیا، حالانکہ ہمارے ایم پی اے طاہر جمیل پر تشدد کیا گیا، ان کے بازو میں شدید چوٹیں آئیں۔
ان کا کہنا ہے کہ آج رات 8 بجے نو منتخب وزیرِ اعلیٰ کی تقریبِ حلف برداری ہو گی، گورنر ہاؤس نوٹیفکیشن بھجوایا ہے، ہمیں اطلاعات ملی ہیں کہ صدرِ پاکستان کی طرح گورنر صاحب بھی حلف نہیں لینا چاہتے، گورنر پنجاب حلف برداری کی تقریب کو مؤخر نہیں کر سکتے۔
’’گورنر آئینی خلاف ورزی کے کھیل کا حصہ نہ بنیں‘‘
عطاء اللّٰہ تارڑ نے کہا کہ گورنر عمر چیمہ صاحب ایک محبٍِ وطن انسان ہیں، آئین کی خلاف ورزی کے کھیل کا حصہ نہ بنیں، گورنر اگر خود نہیں آنا چاہتے تو کسی اور کو آئینی ذمے داری سونپ دیں، خدارا مل بیٹھ کر اسمبلی کو آگے چلائیں، نظام کو آگے چلائیں۔
Comments are closed.