کشمیر پریمیئر لیگ کا پیغام یہی ہے کہ کھیل اور سیاست الگ الگ چیزیں ہیں، جہانگیر خان
لیجنڈری اسکواش پلیئر اور کشمیر پریمیئر لیگ کی ٹیم مظفرآباد ٹائیگرز کے برانڈ ایمبیسیڈر جہانگیر خان کا کہنا ہے کہ کھیل، محبت، دوستی اور امن پیغام دیتے ہیں، کھیل اور سیاست الگ الگ چیزیں ہیں، یہی دنیا کو کشمیر پریمئیر لیگ کا پیغام ہے۔
اسکواش کے سابق عالمی چیمپیئن جہانگیر خان نے جیو نیوز سے گفتگو کرتے ہوئے کہا کہ کے پی ایل میں مظفر آباد ٹائیگرز کا برانڈ ایمبیسیڈر بننے پر خوش ہوں، کے پی ایل کی وجہ سے کشمیر میں کھیلوں کو فروغ ملے گا کھیل محبت دوستی اور امن کا پیغام دیتے ہیں میرا ہمیشہ یہی پیغام ہوتا ہے۔
انہوں نے کہا کہ ہر ملک میں کھیلوں کے اپنے فینز ہوتے ہیں میرے فینز بھارت میں بھی ہیں اور ان کے لوگ کسی اور ملک کے کھلاڑی کے فین ہوں گے اسے اسی نظر سے دیکھنا چاہئے۔
جہانگیر خان نے کہا کہ ہمیں کھیل کو پروموٹ کرنا ہے حریف صرف گراؤنڈ میں ہوتے ہیں باہر سب دوست ہوتے ہیں یہی چیز کھیل ہمیں سکھاتے ہیں، ہمیں یہ پیغام دینا ہے کہ کھیل اور سیاست الگ الگ ہیں۔
جہانگیر خان نے کہا کہ کشمیر میں کرکٹ کی سرگرمیاں تو ابھی شروعات ہیں مزید کام کرنا ہے اور کام کرتے رہنا ہے۔ کے پی ایل پہلا پلیٹ فارم ہے کشمیر میں بہت ٹیلنٹ ہے ،کرکٹ ایتھلیٹکس ہاکی اسکواش ہاکی اور فٹ بال میں ٹیلنٹ ہے اس سے فائدہ اٹھانا چاہئے ٹیلنٹ کو ہمیں سہولیات دینا ہوں گی۔
Comments are closed.