کشمور میں 6 ڈاکوؤں کی ہلاکت پر وزیرِ اعلیٰ سندھ نے کیا کہا؟

 وزیرِ اعلیٰ سندھ مراد علی شاہ نے کشمور میں 6 ڈاکوؤں کی ہلاکت پر ریمارکس دیتے ہوئے کہا ہے کہ میں یہ دیکھتا ہوں کہ ڈاکو مارے گئے۔

گھوٹکی میں میڈیا سے گفتگو کرتے ہوئے مراد علی شاہ نے کہا کہ ڈاکو جہنم رسید ہو گئے، کوئی کریڈٹ کی بات نہیں۔

 وزیرِ اعلیٰ سندھ کا کہنا ہے کہ بزدلوں کو جہنم رسید کیا اس پر شاباش دیں، کریڈٹ کی بات نہیں، یہ کام اللّٰہ پاک نے کیا۔

اس سے قبل وزیرِ اعلیٰ سندھ مراد علی شاہ نے گڈو بیراج کا دورہ کیا۔

جام خان شورو نے وزیرِ اعلیٰ کو پانی کی صورتحال پر بریفنگ دی۔

مراد علی شاہ نے کہا کہ دریائے سندھ کے تمام حفاظتی بند مضبوط ہیں، گھوٹکی میں امن و امان کی صورتحال بہتر ہے۔

ان کا کہنا ہے کہ ڈاکوؤں کے پاس 12 مغوی یرغمال ہیں، 10 کا تعلق کشمور اور 2 کا سکھر سے ہے، مغویوں کو جلد بازیاب کرا لیا جائے گا اور جلد جدید اسلحہ سندھ پولیس کو دیا جائے گا۔

اوباڑو میں حفاظتی بند پر قائم پولیس چوکی پر میڈیا سے گفتگو کرتے ہوئے وزیرِ اعلیٰ سندھ نے کہا تھا کہ کچے کے ڈاکو اب آخری سانسیں لے رہے ہیں، کچے میں تعینات پولیس کے لیے الاؤنس دیا جائے گا۔

انہوں نے کہا کہ پولیس کی تمام ضرورتیں پوری کر دی ہیں، گھوٹکی کے 70 کلو میٹر تک 140 پولیس چوکیاں قائم کی ہیں، ضلع گھوٹکی میں اس وقت ایک بھی اغوا برائے تاوان کا مغوی نہیں۔

مراد علی شاہ کا کہنا ہے کہ گزشتہ سال گھوٹکی پولیس نے 70 ڈاکو مارے اور 40 افراد کو اغواء ہونے سے بچایا، 30، 35 ہزار کمانے والا غریب کیا تاوان ادا کر سکتا ہے؟

وزیرِ اعلیٰ نے کہا کہ وزارت داخلہ سے بات چل رہی ہے جدید ہتھیار بھی مل جائیں گے۔

سندھ کے کچے کے اندھڑ گینگ کے ڈاکوؤں کو کس نے مارا؟ پنجاب اور سندھ پولیس کے کریڈٹ لینے کے لیے متضاد دعوؤں کے بعد سوالات کھڑے ہو گئے۔

ان کا یہ بھی کہنا ہے کہ کشمور سے اغواء ہوئے اقلیتی برادری کے دو افراد کو جلد بازیاب کر الیا جائے گا۔

اس سے قبل ایک بیان میں وزیرِ اعلیٰ سندھ کے ترجمان نے کہا تھا کہ مراد علی شاہ گھوٹکی اور کشمور اضلاع کے کچے میں قائم پولیس چوکیوں کا معائنہ کریں گے اور کچے میں تعینات پولیس اہلکاروں سے ملاقات بھی کریں گے۔

انہوں نے بتایا ہے کہ وزیرِ اعلیٰ سندھ گڈو بیراج پر سیلابی صورتِ حال کا جائزہ بھی لیں گے اور زیرِ تعمیر گھوٹکی کشمور پل کے کام کا جائزہ بھی لیں گے۔

ترجمان کا مزید کہنا ہے کہ وزیرِ اعلیٰ سندھ مراد علی شاہ ایس ایس پی کشمور کے آفس میں اجلاس کی صدارت بھی کریں گے۔

ترجمان نے یہ بھی بتایا ہے کہ وزیرِ اعلیٰ سندھ ایم پی اے اسلم ابڑو سے ان کے بھائی اور بھتیجے کے قتل پر تعزیت بھی کریں گے۔

بشکریہ جنگ