کرکٹ میچ میں امپائر کے فیصلے کی حمایت کرنے والا بےدردی سے قتل

بھارت میں ایک کرکٹ میچ کے دوران امپائر کے فیصلے کی حمایت کرنے والے تماشائی کو کھلاڑیوں نے بےدردی سے قتل کردیا۔ 

بھارتی میڈیا کی رپورٹ کے مطابق مذکورہ واقعہ ریاست اوڈیسا کے بہرامپور میں پیش آیا۔ 

کرکٹ میچ کے دوران امپائر نے ایک ٹیم کے کھلاڑی کو آؤٹ قرار دیا جس پر گراؤنڈ میں تلخ کلامی ہوئی، اس دوران وہاں میچ دیکھنے کے لیے آنے والے تماشائی نے امپائر کے فیصلے کی حمایت کی جو اس کی موت کی وجہ بن گئی۔ 

رپورٹ کے مطابق آؤٹ ہونے والی ٹیم کے کھلاڑیوں اور حامیوں نے اس شخص کو شدید تشدد کا نشانہ بنایا۔

پولیس کا کہنا ہے کہ متاثر شخص کو شدید زخمی حالت میں میں اسپتال لے جایا گیا لیکن وہ زخموں کی تاب نہ لاتے ہوئے چل بسا۔

مذکورہ شخص کی شناخت لکی رؤت کے نام سے ہوئی۔

پولیس کا بتانا ہے کہ انہوں نے ملزمان کی شناخت کرلی ہے جن میں سے ایک کو گرفتار کرلیا گیا ہے جبکہ دوسرا مفرور ہے۔

بشکریہ جنگ