کرکٹ آسٹریلیا پاکستان اور بھارت کو ملاکر سہ فریقی سیریز کی میزبانی کیلئے تیار
کرکٹ آسٹریلیا کے سربراہ نے پاکستان اور بھارت کو شامل کرکے اپنی سرزمین پر سہ فریقی سیریز کروانے پر تیار ہونے کا اشارہ دے دیا۔
روایتی حریف پاکستان اور بھارت کے کرکٹ میچز صرف آئی سی سی ایونٹس اور ایشیا کپ کے مقابلوں تک محدود ہوکر رہ گئے ہیں۔
ایسے میں پاکستان کرکٹر بورڈ (پی سی بی) چیئرمین رمیز راجہ نے ہر سال چار ملکی ٹی ٹوئنٹی سیریز کروانے کا خیال پیش کیا تھا جس میں پاکستان، بھارت، آسٹریلیا اور انگلینڈ شامل تھیں۔
اس حوالے سے کرکٹ آسٹریلیا کے چیف ایگزیکٹو نک ہوکلے کا کہنا تھا کہ ان کے بورڈ نے اس پیشکش پر ابھی تک بات نہیں کی ہے لیکن وہ پاکستان اور بھارت کو لے کر اپنے ملک میں سہ فریقی سیریز کروانے کے لیے تیار ہے۔
ان کا کہنا تھا کہ ذاتی طور پر مجھے سہ فریقی سیریز کا تصور بہت پسند ہے، اور اس نے ماضی میں اچھا کام کیا۔
انہوں نے کہا کہ ہم دونوں کے درمیان ٹیمیوں کے میچز کی میزبانی کے لیے تیار ہیں، آسٹریلیا میں پاکستانی اور بھارتی شہری بھی بڑی تعداد میں رہتے ہیں۔
ہوکلے کا کہنا تھا کہ یہ ایک ایسا مقابلہ ہے جسے دنیائے کرکٹ دیکھنا چاہتی ہے اور اگر مزید کسی ایسے مواقع میں مدد کرسکیں تو ہم ایسا کرنا پسند کریں گے۔
خیال رہے کہ دونوں ٹیمیں آخری مرتبہ ٹی ٹوئنٹی ورلڈکپ 2021 میں آمنے سامنے آئیں جس میں پاکستان نے بھارت کو آؤٹ کلاس کرتے ہوئے 10 وکٹوں سے شکست دی تھی۔
رواں سال آسٹریلیا میں شیڈول ٹی ٹوئنٹی ورلڈکپ میں ایک مرتبہ پھر دونوں ٹیمیں 23 اکتوبر کو میلبورن کے میدان میں آمنے سامنے ہوں گی۔
Comments are closed.