کراچی: 50 تولہ سونا اور 36 لاکھ روپے لوٹنے والے ملزمان گرفتار

کراچی پولیس نے صدر میں 50 تولہ سونا اور 36 لاکھ روپے لوٹنے والے دو ملزمان کو گرفتار کرلیا۔

ترجمان آپریشن و انویسٹی گیشن ڈسٹرکٹ ساؤتھ پولیس کا کہنا ہے کہ پریڈی پولیس کے شعبہ آپریشن اور انویسٹی گیشن کی مشترکہ کارروائی کے دوران 50 تولہ سونے کے زیورات اور اور 36 لاکھ کیش کی ڈکیتی میں ملوث دو ملزمان کو گرفتار کرلیا ہے۔

30 مارچ 2022 کو مسلح ملزمان نے صدر میں واقع ایک سونے کے زیورات کی دکان سے 50 تولہ سونے کے زیورات، 17 لاکھ کیش اور 19 لاکھ روپے مالیت کی بیرونی کرنسی لوٹ کر فرار ہو گئے تھے۔

واقعہ کے فوری بعد مقدمے 248/2022 کا اندراج کرکے تفتیش شروع کی گئی، اسی دوران پریڈی پولیس نے ٹیکنیکل اسٹاف کی مدد سے کیس میں ملوث دو ملزمان کو گرفتار کرلیا ہے جبکہ بقیہ ملزمان کی گرفتاری کے لیے چھاپے مارے جارہے ہیں۔

گرفتار ملزمان کی شناخت فضل اور عمر شریف کے ناموں سے ہوئی، ملزمان کے قبضے سے ڈیڑھ لاکھ کیش اور تقریباً ساڑھے 4 تولہ لوٹا ہوا زیور بھی برآمد کرلیا گیا ہے، ملزمان کے خلاف مقدمہ کا اندراج کر کے مزید تفتیش کی جارہی ہے۔

بشکریہ جنگ