کراچی: 130 روپے فی کلو بکنے والا دودھ 150 کا کردیا گیا

کراچی میں ڈیری فارمرز ایسوسی ایشن نے دودھ کی قیمت میں از خود اضافہ کردیا ہے، 130 روپے کلو میں فروخت ہونے والا دودھ اب 150 روپے میں فروخت کیا جارہا ہے۔

کراچی میں دودھ کی قیمت کو بھی پر لگ گئے، ڈیری فارمرز ایسوسی ایشن نے شہریوں پر یکم مارچ سے مہنگائی کا ایک بم گِرادیا، جو دودھ 130 روپے کلو مل رہا تھا، وہ 20 روپے اضافے کے ساتھ ڈیڑھ سو روپے کلو کردیا گیا۔ 

ادھر دہی کی فی کلو قیمت 40 روپے اضافے کے ساتھ 240 روپے کردی گئی ہے۔

شہری اس من مانے اضافے پر پریشان ہیں اور کہتے ہیں کہ ڈیری فارمرز نے دودھ اور دہی کی قیمت اپنے طور پر بڑھائی کیونکہ ضلعی انتظامیہ کی جانب سے اس بارے میں کوئی نوٹیفکیشن جاری نہیں کیا گیا۔

شہریوں کا کہنا ہے کہ حکومتی سطح پر قیمتیں کنٹرول کرنے کا مؤثر نظام نہ بنایا گیا تو کھانے پینے کی ضروری اشیا عوام کی پہنچ سے اسی طرح دور ہوتی رہیں گی۔

بشکریہ جنگ