کراچی: ہتھنی نور جہاں کی حالت میں معمولی بہتری

کراچی چڑیا گھر میں موجود ہتھنی نور جہاں کی حالت میں معمولی بہتری آئی ہے۔

اس حوالے سے کراچی چڑیا گھر کی انتظامیہ کا کہنا ہے کہ ہتھنی نور جہاں کی حالت بہتری کی جانب گامزن ہے، اسے رات کو کرین سے چلانے کی کوشش بھی کی گئی۔

انتظامیہ کے مطابق مقامی ڈاکٹرز بھی ہتھنی کو مسلسل طبی امداد فراہم کر رہے ہیں اور ٹیم فورپاز سے مسلسل ہدایات لی جا رہی ہیں۔

ڈائریکٹر کراچی چڑیا گھر کنور ایوب نے میڈیا سے گفتگو کرتے ہوئے کہا کہ ہتھنی کی بیماری کو فورپاز نے سنجیدگی سے لینے کا کہا تھا، نور جہاں شدید علیل ہے لیکن خطرے کی کوئی بات نہیں۔

کنور ایوب نے کہا کہ ہمیں امید ہے کہ یہ جلد اپنی صحت کی جانب گامزن ہوگی، رات کو ہم نے اس کو کرین سے چلانے کی کوشش کی تھی۔

انہوں نے کہا کہ ڈاکٹرز مطمئن تھے کہ یہ حرکت کر رہی ہے، ہتھنی کو اس حالت میں پہنچانے پر بختاور بھٹو کا غصہ جائز ہے۔

کنور ایوب نے کہا کہ وزیرِ بلدیات نے کل یہاں کا دورہ کیا اور انتظامات کا جائزہ لیا، ہم پُرامید ہیں کہ جلد ہتھنی صحت مند ہو جائے گی۔

علاوہ ازیں ایڈمنسٹریٹر کراچی ڈاکٹر سیف الرحمٰن نے بھی چڑیا گھر کا دورہ کیا اور ہتھنی کی صورتِ حال کا جائزہ لیا۔

کنور ایوب نے کہا کہ ہتھنی کی طبیعت میں دوا کے باوجود بھی بہتری نہیں آرہی، فورپاز کی ٹیم سمیت تمام ڈاکٹرز ہتھنی کو بچانے کی کوششں کررہے ہیں۔

ایڈمنسٹریٹر کراچی نے کہا کہ انتظامیہ کو سندھ حکومت کا بھرپور تعاون حاصل ہے، سب کی ایک ہی کوشش ہے کہ نور جہاں چلنے کے قابل ہو جائے۔

ڈاکٹر سیف الرحمٰن نے کہا کہ اگر انسان بھی بیمار ہو جائے تب بھی ڈاکٹروں سے ہدایات لی جاتی ہے، ہتھنی کی صحت پر کسی بھی قسم کی کوتاہی برداشت نہیں کی جائے گی، اس کی دیکھ بھال کے لیے پوری مشینری اور ڈاکٹرز یہاں موجود ہیں۔

بشکریہ جنگ