کراچی: کورونا کے بھارتی ڈیلٹا ویرینٹ کے 35 کیسز کی تصدیق

محکمہ صحت سندھ نے ملک کے سب سے بڑے شہر کراچی میں کورونا وائرس کے بھارتی ڈیلٹا ویرینٹ کے 35 کیسز کی تصدیق کر دی۔

سندھ کے محکمہ صحت کے مطابق اب تک ڈیلٹا ویرینٹ کے 35 کیسز کراچی میں سامنے آ چکے ہیں، ڈیلٹا ویرینٹ سے متاثرہ افراد میں وائرس کی شدید علامات سامنے آئی ہیں۔

ملک بھر میں کورونا وائرس سے انتقال کرنے والے افراد کی مجموعی تعداد 22 ہزار 618 ہو گئی جبکہ کُل کورونا مریضوں کی تعداد 9 لاکھ 76 ہزار 867 ہو چکی ہے۔

محکمہ صحت سندھ کا کہنا ہے کہ لیاری میں ایک ہی خاندان کے 5 افراد ڈیلٹا وائرس سے متاثر پائے گئے، ڈیلٹا ویرینٹ کے ان تمام متاثرہ افراد کا علاج جاری ہے۔

سندھ کے محکمہ صحت نے یہ بھی بتایا ہے کہ شہرِ قائد کراچی میں رواں ماہ کورونا وائرس کے بھارتی ڈیلٹا ویرینٹ کے 18 کیسز رپورٹ ہو چکے ہیں۔

دنیا بھر میں کورونا وائرس سے متاثرہ افراد کی تعداد 18 کروڑ 81 لاکھ 34 ہزار 948 تک جا پہنچی ہے جبکہ اس موذی وائرس سے اموات 40 لاکھ 57 ہزار 18 ہو گئیں۔

دوسری جانب سندھ کی وزیرِ صحت ڈاکٹر عذرا پیچوہو نے بھارتی ڈیلٹا ویرینٹ کے پھیلاؤ کے پیشِ نظر اپیل کی ہے کہ عوام اپنی نقل و حرکت محدود کریں اور احتیاطی تدابیر اپنائیں۔

وزیرِ صحت سندھ کا یہ بھی کہنا ہے کہ عوامی مقامات پر ماسک کا استعمال ضرور کریں، ڈیلٹا ویرینٹ کے پڑوسی ملک بھارت میں ہونے والے اثرات ہمارے سامنے ہیں۔

بشکریہ جنگ