کراچی کنگز کا کوئٹہ گلیڈی ایٹرز کو جیت کیلئے 165 رنز کا ہدف

ایچ بی ایل پی ایس ایل 8 کے 22ویں میچ میں کراچی کنگز نے کوئٹہ گلیڈی ایٹرز کو جیت کے لیے 165 رنز کا ہدف دے دیا۔

پنڈی کرکٹ اسٹیڈیم میں کھیلے گئے اس میچ میں کوئٹہ گلیڈی ایٹرز کے کپتان سرفراز احمد نے ٹاس جیت کر کراچی کنگز کو پہلے بیٹنگ کی دعوت دی۔ 

کراچی کنگز کا آغاز اچھا نہ رہا، پہلی ہی گیند پر نسیم شاہ نے میتھیو ویڈ کو میدان بدر کردیا، جبکہ نئے آنے والے بلے باز طیب طاہر 7 جبکہ ان کے بعد قاسم اکرم 8 رنز کے مہمان ٹھہرے۔ 

اوپننگ بلے باز ایڈم روسنگٹن نے ایک جانب جارحانہ کھیل جاری رکھا لیکن سامنے سے وکٹیں گرنے کا سلسلہ جاری رہا۔ 

کراچی کے تیسرے آؤٹ ہونے والے بلے باز شعیب ملک تھے جو چھکا لگانے کی کوشش میں 13 رنز بنا کر کیچ آؤٹ ہوگئے۔ 

روسنگٹن کا ساتھ کپتان عماد وسیم نے خوب نبھایا، دونوں کے درمیان 30 گیندوں پر 46 رنز کی پارٹنر شپ نے کراچی کنگز کو باوقار ٹوٹل تک لے جانے میں مدد کی۔ 

اوپننگ بیٹر ایڈم روسنگٹن 124 کے مجموعے پر آؤٹ ہوئے، انہوں نے 45 گیندوں پر 69 رنز کی اننگز کھیلی۔ 

ان کے بعد کپتان عماد وسیم نے رنز بنانے کا سلسلہ بڑھایا۔ یہاں ان کا ساتھ آل راؤنڈر عامر یامین نے دیا۔ عماد 30 جبکہ عامر 23 رنز کے ساتھ ناقابلِ شکست رہے۔ 

کراچی کنگز کی ٹیم نے مقررہ 20 اوورز میں 6 وکٹوں کے نقصان پر 164 رنز بنائے۔ 

کوئٹہ کی جانب سے نسیم شاہ اور ایمل خان نے دو دو جبکہ محمد نواز اور نوین الحق نے ایک ایک وکٹ لی۔

ایونٹ میں کراچی کنگز نے اب تک 8 میچز کھیلے جس میں اسے 2 میں کامیابی ملی جبکہ کوئٹہ گلیڈی ایٹرز کی ٹیم 7 میچز میں صرف ایک فتح سمیٹ سکی۔

عماد وسیم کراچی کنگز کی قیادت کر رہے ہیں جبکہ دیگر کھلاڑیوں میں ایڈم روسنگٹن، طیب طاہر، شعیب ملک، قاسم اکرم، میتھیو ویڈ، جیمز فلر، عامر یامین، موسیٰ خان، محمد عامر اور تبریز شمسی شامل ہیں۔

کوئٹہ گلیڈی ایٹرز میں کپتان سرفراز احمد، مارٹن گپٹل، عمیر یوسف، افتخار احمد، نجیب اللہ زادران، محمد نواز، عمر اکمل، ڈیوئین پریٹوریئس، نسیم شاہ اور نوین الحق شامل ہیں۔

بشکریہ جنگ