کراچی: پولیس مقابلے میں 3 ملزمان گرفتار، خاتون کی لاش برآمد

کراچی کے مختلف علاقوں میں پولیس مقابلے کے بعد 3 ملزمان کو زخمی حالت میں گرفتار کر لیاگیا، فائرنگ کے واقعات میں 4 افراد زخمی ہو گئے، خاتون کی پھندا لگی لاش ملی ہے۔

پولیس نے کورنگی لنک روڈ پر مقابلے کے بعد 2 ڈاکوؤں کو زخمی حالت میں گرفتار کر لیا، ملزمان زوہیب اور خلیل کے قبضے سے اسلحہ، موبائل فون اور موٹر سائیکل ملی ہے۔

پولیس کے مطابق پیر آباد میں منگھو پیر روڈ پر مقابلے کے بعد پولیس نے ایک منشیات فروش کو زخمی حالت میں گرفتار کر لیا جس کے قبضے سے ڈیڑھ کلو چرس اور پستول ملی ہے۔

پولیس کے مطابق اورنگی ٹاؤن کی ایم پی آر کالونی میں جھگڑے کے دوران فائرنگ سے 3 افراد زخمی ہو گئے جنہیں عباسی شہید اسپتال منتقل کر دیا گیا ہے۔

ریسکیو اداروں کے مطابق کورنگی کے علاقے مہران ٹاؤن کے قریب فائرنگ سے 15 سالہ عبدالرحمٰن نامی لڑکا زخمی ہو گیا۔

پولیس کے مطابق اورنگی ٹاؤن کے علاقے گلشنِ بہار میں گھر سے خاتون کی پھندا لگی لاش ملی ہے۔

مقتولہ کی شناخت صدف زوجہ دانش کے نام سے ہوئی ہے، واقعے سے متعلق تحقیقات کی جا رہی ہیں۔

بشکریہ جنگ