کراچی ٹیسٹ: تیسرا دن ختم، پاکستان کے 9 وکٹوں پر 407 رنز

کراچی ٹیسٹ کے تیسرے دن کا کھیل ختم ہوگیا ہے، قومی ٹیم نے 9 وکٹوں کے نقصان پر 407 رنز بنالیے جبکہ مہمان ٹیم کی برتری ختم کرنے میں مزید 42 رنز درکار ہیں۔ 

امام الحق اور سعود شکیل نے  3 وکٹ کے نقصان پر 154 رنز سے آج دن کے کھیل کا آغاز کیا جس کے بعد 182 رنز پر پاکستان کی چوتھی وکٹ گر گئی۔

نیوزی لینڈ کے فاسٹ بولر ٹِم ساؤتھی نے امام الحق کو 83 رنز پر کیچ آؤٹ کرایا۔

پانچویں وکٹ پر سعود شکیل اور سرفراز احمد نے شاندار اور مضبوط پارٹنرشپ قائم کی۔

اس دوران سرفراز احمد نے اپنی لگاتار تیسری نصف سنچری اسکور کی جبکہ اس کے کچھ ہی دیر بعد سعود شکیل نے سنچری اسکور کی۔

سعود شکیل اور سرفرازاحمد نے 150 رنز کی پارٹنرشپ قائم کر کے ٹیم کا اسکور 332 تک پہنچایا جس کے بعد سرفراز احمد 78 رنز پر اسٹمپ آؤٹ ہوگئے۔

سرفراز کے بعد آغا سلمان نے 41 رنز بنا کر خسارے کو مزید کم کرنے کی کوشش کی۔ آغا سلمان اعجاز پٹیل کی گیند پر سلپ میں کیچ آؤٹ ہوئے۔ 

ان کے بعد آنے والے بیٹرز میں حسن علی 4، نسیم شاہ 4 اور میر حمزہ بغیر کوئی رن بنائے پویلین لوٹے۔ 

تیسرے دن کھیل کے اختتام تک سعود شکیل 124 اور ابرار احمد بغیر کوئی رن بنائے کیریز پر موجود ہیں جو چوتھے دن کھیل کا آغاز کریں گے۔  

گزشتہ روز عبداللّٰہ شفیق 19، شان مسعود 20 اور بابر اعظم 24 رنز بناکر آؤٹ ہوگئے تھے۔

پاکستان ٹیم نے دوسرے دن کھیل کا آغاز اچھے انداز میں کیا تھا اور 9 گیندوں بعد ہی پہلی اور مجموعی طور پر نیوزی لینڈ کی ساتویں وکٹ حاصل کی۔

فاسٹ بولر نسیم شاہ نے اش سودھی کو 11 رنز پر بولڈ کیا۔

پہلے ہی سیشن میں نیوزی لینڈ کے 340 کے اسکور پر ابرار احمد نے ٹام بلنڈل کو 51 رنز پر بولڈ کیا جس کے کچھ ہی دیر بعد ایک مرتبہ پھر ابرار نے پاکستان کے لیے وکٹ حاصل کی۔

ابرار احمد نے 345 رنز پر نیوزی لینڈ کی نویں وکٹ حاصل کی۔ انہوں نے ٹِم ساؤتھی کو 10 رنز پر اسٹمپ آؤٹ کرایا۔

آخری وکٹ پر بڑی پارٹنرشپ

کیوی ٹیم کے آخری دو بیٹرز میٹ ہنری اور اعجاز پٹیل کے درمیان 104 رنز کی پارٹنرشپ قائم ہوئی جس کے بعد دوسرے سیشن میں نیوزی لینڈ کی آخری وکٹ ابرار احمد نے حاصل کی تھی۔

انہوں نے اعجاز پٹیل کو 35 رنز پر کیچ آؤٹ کرایا جبکہ میٹ ہنری 68 رنز پر ناٹ آؤٹ رہے تھے۔

پہلی اننگز میں نیوزی لینڈ کے ڈیون کونوے 122، ٹام لیتھم 71 اور ٹام بلنڈل 51 رنز بنا کر آؤٹ ہوئے۔

پاکستان کی جانب سے ابرار احمد نے 4، نسیم شاہ اور آغا سلمان نے 3،3 وکٹیں حاصل کیں۔

کراچی ٹیسٹ کے پہلے دن نیوزی لینڈ نے پہلی اننگز میں 6 وکٹ کے نقصان پر 309 رنز بنائے تھے۔

پاکستان کی ٹیم

دوسرے ٹیسٹ کے لیے عبداللّٰہ شفیق، امام الحق، شان مسعود، بابر اعظم (کپتان)، سعود شکیل، سرفراز احمد، سلمان آغا، حسن علی، نسیم شاہ، میر حمزہ اور ابرار احمد قومی ٹیم کا حصہ ہیں۔

نیوزی لینڈ کی فائنل الیون

ٹام لیتھم، ڈیون کونوے، کین ولیمسن، ہنری نکولس، ڈیرل مچل، ٹام بلنڈل، مائیکل بریسویل، ٹِم ساؤتھی (کپتان)، اش سودھی، میٹ ہنری اور اعجاز پٹیل نیوزی لینڈ کی فائنل الیون کا حصہ ہیں۔

بشکریہ جنگ