کراچی: نجی اسکول کی کلاس روم میں فائرنگ سے طالبہ زخمی

کراچی کے علاقے اورنگی ٹاؤن میں قائم نجی اسکول میں فائرنگ سے طالبہ زخمی ہوگئی۔

اورنگی ٹاؤن کراچی میں فائرنگ سے اسکول کی طالبہ علیشا زخمی ہوگئی۔ علیشا نے پولیس کو دیے گئے بیان میں بتایا کہ ساتھی طالب علم فضل اللّٰہ اسکول بیگ کے اندر اسلحہ لایا تھا، وہ کلاس میں موجود دوستوں کو اسلحہ دکھارہا تھا کہ اچانک گولی چلی اور وہ زخمی ہوگئی۔

پولیس حکام کا کہنا ہے کہ علیشا کے مطابق گولی پیچھے سے چلی اور اس کی کمر میں لگی، واقعے کے بعد طالب علم فضل اللّٰہ فرار ہے جبکہ زخمی طالبہ کو اسٹیڈیم روڈ پر واقعہ نجی اسپتال منتقل کر دیا گیا۔

اب تک کی تحقیقات کے مطابق گولی حادثاتی طور پر ہی چلی تاہم فائرنگ کے واقعے کی مختلف زاویوں سے تحقیقات کر رہے ہیں۔

 پولیس کا کہنا ہے کہ فضل اللّٰہ کے خلاف اقدام قتل کی دفعہ کے تحت مقدمہ درج کیا جائے گا ،زخمی لڑکی کے والد کا بیان لینے کے بعد مقدمے کا اندراج کیا جائے گا۔

بشکریہ جنگ