کراچی میں شہنشاہ جاپان کی سالگرہ کی رنگا رنگ تقریب

کراچی میں تعینات جاپان کے قونصل جنرل توشی کازو ایسومورا نے کہا ہے کہ جاپان اور پاکستان کے درمیان موجودہ تجارتی حجم 2 ارب ڈالر ہے، جسے مزید بڑھانے کی ضرورت ہے، دونوں ممالک کی آبادی کو دیکھتے ہوئے جاری تجارت اطمینان بخش نہیں ہے۔

وہ مقامی ہوٹل میں شہنشاہ جاپان کی سالگرہ کی تقریب سے خطاب کررہے تھے، جسے جاپان پاکستان بزنس فورم کے چیئرمین کلیم فاروقی، ایڈوائزر ریسورسز محمد عظمت شیکیگی آتاکا نے بھی خطاب کیا۔

تقریب میں پاکستان کی مختلف سیاسی و سماجی شخصیات، سفارتکاروں، تاجروں اور صحافیوں کی بڑی تعداد نے شرکت کی، اس موقع پر جاپانی شہنشاہ کی سالگرہ کا کیک کاٹا گیا۔

قونصل جنرل نے مزید کہا کہ ان کی کوشش ہے کہ دونوں ملکوں کے درمیان تجارت، معیشت، سماجی اور ثقافتی شعبوں میں مزید تعلقات مستحکم ہوں۔

جاپانی قونصل جنرل نے یہ بھی کہا کہ ان کی کوشش رہی ہے کہ دونوں ملکوں کے درمیان زیادہ وفود کے تبادلے ہوں تاکہ تعاون کو مزید بڑھایا جاسکے۔

انہوں نے کہا کہ وہ پاکستان میں مختلف وقتوں میں 20 سال سے خدمات انجام دیتے رہے ہیں، آئندہ ماہ مدت پوری کرکے واپس جاپان چلے جائیں گے، تاہم وہ پاکستان سے بہت سی یادیں لےکر جارہے ہیں۔

انہوں نے کہا کہ کورونا کی وجہ سے پوری دنیا متاثر ہوئی، اب صورتحال میں بہتری آرہی ہے، جس کی واضح مثال آج کی تقریب ہے، جس میں کافی تعداد میں مہمان آئے ہیں۔

انہوں نے کہا کہ کراچی میں اچھا وقت گزرا ہے، یہاں میں آزادانہ گھومتا ہوں، یہاں دوستوں کا حلقہ بہت وسیع ہے۔

تقریب سے خطاب کرتے ہوئے کلیم فاروقی نے کہا کہ دوسری جنگ عظیم کے بعد جاپان نے نئے سفر کا آغاز کیا اور ترقی کی نئی منزلیں طے کیں۔

انہوں نے کہا کہ پاکستان ٹیکسٹائل کے شعبے میں جاپان سے تعاون کرتا ہے اور جاپان ٹیکنالوجی کے شعبے میں پاکستان کو مدد فراہم کر رہا ہے۔

انہوں نے کہا کہ 20 سال قبل جاپان پاکستان فورم کا قیام عمل میں آیا تھا، موجودہ وقت فورم کی کوششوں سے دونوں ملکوں کی تاجر برادری تجارت کو مزید فروغ دینے کی بھرپور کوشش کررہی ہے۔

محمد عظمت شکیگی اتاکا نے کہا کہ وہ گزشتہ 45 برس سے پاکستان میں مقیم ہیں، انہوں نے جامعہ کراچی سے ماسٹر کیا اور مختلف عہدوں پر پاکستان میں خدمات انجام دیں، پاکستان میں جاپان کی متعدد آٹو موبائل کمپنیوں کو متعارف کرانے میں بھی ان کا کلیدی کردار ہے۔

انہوں نے کہا کہ موجودہ وقت میں ضروری ہوچکا ہے کہ دونوں ملکوں کے عوام کے درمیان زیادہ تعلقات قائم ہوں اور خاص کر ثقافتی شعبوں میں زیادہ وفود دونوں ملکوں کا دورہ کریں۔

بشکریہ جنگ