کراچی: فٹبال ٹورنامنٹ میں میچ فکسنگ پر ٹیم کو ایونٹ سے باہر کردیا گیا

کراچی میں جاری رمضان کپ فلڈ لائٹ فٹبال ٹورنامنٹ میں میچ  فکسنگ پر ٹیم کو ایونٹ سے باہر کردیا گیا۔

منتظمین کا کہنا ہے کہ نیشنل شاہین اور بابل اسپورٹس کے درمیان میچ فکسڈ ہوا تھا، سوشل میڈیا پر ویڈیوز وائرل ہونے کے بعد منتظمین نے ایکشن لیا۔

ٹورنامنٹ سیکریٹری ناصر اسماعیل کا کہنا ہے کہ فکسنگ میں ملوث ٹیم نیشنل شاہین کو سیمی فائنل سے باہر کردیا گیا ہے جبکہ بابل اسپورٹس پہلے ہی ٹورنامنٹ سے باہر تھی۔

ناصر اسماعیل کا یہ بھی کہنا تھا کہ میچ فکسنگ میں دونوں ٹیموں کے کھلاڑی ملوث تھے۔

دوسری جانب میچ میں شریک بابل اسپورٹس کلب نے بھی اپنے کھلاڑیوں کیخلاف ایکشن لیتے ہوئے ملوث کھلاڑیوں پر چار چار ماہ کی پابندی عائد کردی ہے۔

بابل اسپورٹس کلب انتظامیہ کا کہنا ہے کہ ہاف ٹائم میں کھلاڑیوں نے ملی بھگت سے میچ فکس کیا تھا۔

بشکریہ جنگ