کراچی شیر شاہ دھماکے سے متعلق ترجمان حبیب بینک لمیٹڈ کا بیان

کراچی کے علاقے شیر شاہ  میں ہونے والے دھماکے سے متعلق  ترجمان حبیب بینک لمیٹڈ کا بیان سامنے آگیا۔

ترجمان حبیب بینک لمیٹڈ علی حبیب نے کہا ہے کہ 18 دسمبر کی دوپہر کو شیر شاہ کراچی میں ہونے والے افسوس ناک دھماکے میں ہماری برانچ کی عمارت کو نقصان پہنچا، جس میں متعدد جانیں گئیں اور لوگ زخمی ہوئے۔

ترجمان کا کہنا ہے کہ بینک کی ہمدردیاں دھماکے میں جاں بحق ہونے والوں کے لواحقین کے ساتھ ہیں۔

دھماکے کی شدت کیمرے کے ہلنے سے بھی محسوس کی جاسکتی ہے۔

ترجمان کا کہنا تھا کہ صورتحال کا جائزہ لے رہے ہیں، حادثے کی جگہ پر موجود حکام دھماکے کی نوعیت اور وجوہات کا تعین کررہے ہیں، جیسے ہی تفصیلات واضح ہوں گی انھیں میڈیا کے ساتھ شیئر کیا جائے گا۔

انہوں نے کہا کہ اس وقت ہماری اولین ترجیح متاثرین کو ریسکیو اور ریلیف فراہم کرنا ہے۔ اپنے عملے اور صارفین کی حفاظت ہماری ترجیحات میں شامل ہے۔

دھماکے کے نتیجے میں نجی بینک کی عمارت تباہ ہوگئی جبکہ اطراف کی عمارتوں کو نقصان پہنچا ہے، واقعے میں 12 افراد جاں بحق اور متعدد زخمی ہو گئے۔

ترجمان نے کہا کہ بینک کراچی سمیت ملک بھر میں اپنی سروسز جاری رکھے گا۔

ترجمان کا مزید کہنا تھا کہ حبیب بینک عمارت میں کرایہ داروں میں ایک کرایہ دار تھا، عمارت میں مزید کرایہ دار بھی تھے۔

بشکریہ جنگ