کراچی سے 10 روز میں تیسری لڑکی لاپتہ

کراچی سے 10 روز کے دوران تیسری لڑکی مبینہ طور پر لاپتہ ہوگئی، سولجر بازار سے 25 سال کی لڑکی تین روز قبل مبینہ طور پر لاپتہ ہوئی تھی۔

اہلخانہ نے لڑکی کے لاپتہ ہونے کی درخواست سولجر بازار تھانے میں دے دی ہے۔

لڑکی کے بھائی کی جانب سے درخواست میں کہا گیا ہے کہ میری بہن دینار 22 اپریل کو ٹیوشن پڑھانے گئی اور واپس نہیں آئی۔

بھائی کا کہنا ہے کہ بہن کا موبائل فون بھی بند ہے، پولیس مدد فراہم کرے۔

اس حوالے سے پولیس کا کہنا ہے کہ لڑکی کی تلاش شروع کردی ہے، اہلخانہ نے فی الحال مقدمے سے منع کیا ہے، لڑکی کے موبائل سے متعلق تفصیلات حاصل کی جارہی ہیں۔

خیال رہے کہ 20 اپریل کو کراچی کے علاقے سعود آباد سے 14 سالہ لڑکی نمرہ کاظمی لاپتہ ہوئی تھی جبکہ 16 اپریل کو کراچی کے علاقے الفلاح، گولڈن ٹاؤن سے 14 سالہ دعا زہرہ لاپتہ ہوئی تھی۔

بشکریہ جنگ