کراچی ایئرپورٹ پر حملے کا 8واں سال، اے ایس ایف کا یوم شہداء

کراچی ایئرپورٹ پر حملے کے 8 سال مکمل ہونے پر ایئرپورٹس سیکیورٹی فورس کے ہیڈ کوارٹر کراچی میں اے ایس ایف کا آٹھواں یوم شہداء انتہائی عقیدت و احترام کے ساتھ منایا گیا۔

ترجمان اے ایس ایف کے مطابق ملک کے تمام ایئرپورٹس پر دن کے آغاز پر قرآن خوانی کی گئی اور شہداء کے درجات کی سر بلندی کیلئے دعا کی گئی۔

مرکزی تقریب اے ایس ایف ہیڈکوارٹرز کراچی میں منعقد ہوئی، اس موقع پر یادگار شہداء پر حاضری دی گئی اور پھولوں کی چادر چڑھائی گئی۔

تقریب میں ڈائریکٹر جنرل اے ایس ایف میجر جنرل عابد لطیف خان ہلالِ امتیاز (ملٹری) کا پیغام پڑھ کر سنایا گیا۔

ڈائریکٹر جنرل کے پیغام میں بتایا گیا کہ 8 جون 2014 اے ایس ایف کی تاریخ کا وہ روشن باب ہے، جب اے ایس ایف کے شہداء اور غازیوں نے وطن عزیز کے ہوائی اڈوں کی حفاظت کیلئے جانوں کا نذرانہ پیش کیا۔

پیغام میں مزید کہا گیا کہ 8 جون کی شب جب دشمن اپنے ناپاک عزائم کے ساتھ کراچی ایئرپورٹ پر حملہ آور ہوا تو اس کا واسطہ انتہائی پیشہ ورانہ مہارت کی حامل فورس سے پڑا، جس نے دشمن کے ناپاک عزائم کو اپنے پاؤں تلے روند دیا اور دنیا میں ایوی ایشن انڈسٹری کی حفاظت کی تاریخ میں ایک نیا باب رقم کیا۔

مزید برآں اے ایس ایف کے افسران اور جوانوں کی پیشہ ورانہ استعداد کو بڑھانے اور عصر حاضر کے درپیش خطرات سے نبرد آزما ہونے کے لیے فورس کے تربیتی نظام کو نہ صرف جدید ترین خطوط پر استوار کیا گیا ہے بلکہ دنیا میں موجود بہترین سیکیورٹی ساز و سامان سے بھی لیس کیا جا رہا ہے۔

عرصہ دراز کے بعد مزید غیر ملکی ایئرلائنز کا پاکستان کیلئے فلائٹ آپریشن بحال کرنا، کثیر مقدار میں منشیات، سونا اور کرنسی کی بیرون ملک اسمگلنگ کی کوشش کو ناکام بنانا، اسلحہ و بارود اور ممنوعہ اشیاء کی برآمدگی اے ایس ایف کی پیشہ ورانہ صلاحیتوں کا منہ بولتا ثبوت ہے۔

بشکریہ جنگ