کراچی، 10 گھنٹے سے زائد پھنسے بھارتی مسافر دوحا روانہ

بھارتی دارالحکومت دہلی سے دوحا جانیوالی قطر ایئر ویز کی پرواز کی کراچی میں ہنگامی لینڈنگ کے 10 گھنٹے سے زائد وقت گزرنے کے بعد  295 بھارتی مسافروں کو متبادل پرواز سے قطر روانہ کر دیا گیا ہے۔ 

قطر ایئر ویز کی پرواز کیو آر 579 نے بھارتی دارالحکومت دہلی سے 33 منٹ کی تاخیر سے مقامی وقت کے مطابق صبح 4 بجکر 13 منٹ پر دوحا کیلئے ٹیک آف کیا۔

بھارتی دارالحکومت دہلی سے دوحا کے لیے جانے والی پرواز میں آگ لگنے کے سگنل موصول ہونے پر طیارے کو ہنگامی طور پر کراچی اتار لیا گیا۔

ایک گھنٹہ 25 منٹ کا سفر کرکے ایئربس اے 350 طیارہ پاکستان کی فضائی حدود میں بلوچستان کے شہر وڈھ کے قریب تھا کہ طیارے کے انجن کارگو کیبن اے اور سی میں دھواں بھر جانے کے سگنل دیئے۔

 A7-ALZ رجسٹریشن کا طیارہ 40 ہزار فٹ کی بلندی پر تھا کہ اچانک ہنگامی صورتحال پر پائلٹ نے کراچی ٹریفک کنٹرول کو صورتحال سے آگاہ کیا اور انسانی ہمدردی کی بنیاد پر طیارے کی کراچی لینڈنگ کی اجازت طلب کی۔

اس پر کراچی ایئرپورٹ ٹریفک کنٹرول نے تمام ضروری ہنگامی انتظامات کئے یوں اڑان کے ٹھیک 2 گھنٹے بعد مقامی وقت کے مطابق صبح 5 بجکر 45 منٹ پر کراچی کے جناح انٹرنیشنل ایئرپورٹ پر طیارہ لینڈ کر گیا۔

سول ایوی ایشن حکام نے کراچی میں ہنگامی لینڈنگ کرنے والے قطر ایئر ویز کے طیارے کو ایئرپورٹ پر روک لیا ہے جبکہ مسافروں کو لے جانے کیلئے متبادل طیارہ کراچی ایئرپورٹ پہنچ گیا ہے۔

طیارے میں عملے سمیت 295 افراد سوار تھے جو محفوظ رہے انہیں فوری طور پر جناح ٹرمینل کے ٹرانزٹ لاؤنچ منتقل کر دیا گیا۔

قومی ایئر لائن پی آئی اے کے انجینئرز نے طیارے کا مکمل معائنہ کیا مگر جہاز دوبارہ اڑان کے قابل نہ ہونے کی وجہ سے قطر ایئر ویز نے متبادل طیارے کا بندوبست کیا جو صبح سوا 11 بجے کراچی پہنچا اور تمام بھارتی اور غیر ملکی مسافروں کو لے کر سہہ پہر 3:56 بجے فلائٹ کیو آر 3139 کے طور پر دوحا کے لیے روانہ ہوگیا۔

بشکریہ جنگ