کراچی، پاک ویسٹ انڈیز دوسرا ٹی ٹوئنٹی آج ہوگا

پاکستان اور ویسٹ انڈیز کے درمیان تین میچز کی سیریز کا دوسرا ٹی ٹوئنٹی آج کراچی میں کھیلا جائے گا۔ یہ میچ نیشنل اسٹیڈیم میں شام 6 بجے شروع ہوگا۔

گزشتہ روز کھیلے گئے پہلے ٹی ٹوئنٹی میچ میں پاکستان ٹیم نے ویسٹ انڈیز کو 63 رنز سے ہرا کر سیریز میں ایک صفر کی برتری حاصل کرلی تھی۔ اس میچ میں حیدر علی کو 39 گیندوں پر 68 رنز کی اننگز کھیلنے پر پلیئر آف دی میچ کا ایوارڈ دیا گیا تھا۔

مہمان ٹیم کو 63 رنز سے شکست دے کر پاکستان ٹیم ایک سال میں سب سے زیادہ ٹی ٹوئنٹی میچز جیتنے والی ٹیم بن گئی۔

دونوں ٹیموں کے درمیان سیریز کا تیسرا میچ جمعرات کو کراچی میں ہی کھیلا جائے گا جس کے بعد 3 ون ڈے انٹرنیشنل میچز کی سیریز بھی شیڈول ہے۔

یاد رہے کہ اس سے قبل پاکستان نے بنگلادیش کیخلاف ٹی ٹوئنٹی سیریز تین صفر اور ٹیسٹ سیریز دو صفر سے جیتی تھی۔

بشکریہ جنگ