کراچی، شاہ لطیف میں پولیس مقابلہ،زخمی ملزم گرفتار، 3 فرار

کراچی میں شاہ لطیف کے علاقے میں پولیس نے مقابلے کے بعد 1 زخمی ملزم کو اسلحہ سمیت گرفتار کرلیا جبکہ ملزم کے 3 ساتھی فرار ہوگئے۔

ایس ایس پی ملیر کے مطابق پولیس اہلکار شاہ لطیف میں گشت پر تھے کہ اولڈ ریلوے کوارٹر کے قریب موٹرسائیکل سوار 4 افراد کو رکنے کا اشارہ کیا تو ملزمان نے پولیس پر فائرنگ کرکے فرار ہونے کی کوشش کی۔

پولیس کے مطابق خوش قسمتی سے ملزمان کی فائرنگ سے کوئی جانی نقصان نہیں ہوا۔

اس موقع پر پولیس نے ملزمان کا پیچھا کیا اور فائرنگ کے تبادلے کے بعد 1 ملزم کو زخمی حالت میں گرفتار کرلیا جبکہ دیگر 3 ساتھی فرار ہونے میں کامیاب ہوگئے۔

پولیس نے گرفتار ملزم کی شناخت گلزار کے نام سے کی ہے جبکہ ملزم نے فرار ہوئے ساتھیوں کے نام سلیم، فہیم اور راشد بتائے ہیں۔

پولیس نے گرفتار ملزم سے اسلحہ، موبائل فونز، نقد رقم اور موٹر سائیکل برآمد کرلی ہے۔

بشکریہ جنگ