کراچی، تہہ خانے اور گراؤنڈ فلور میں آگ بجھا دی گئی، فائر آفیسر

سینئر فائر آفیسر کا کہنا ہے کہ کراچی سپر اسٹور کے تہہ خانے اور گراؤنڈ فلور میں آگ بجھادی گئی۔ 

فائر آفیسر کا کہنا ہے کہ سپر اسٹور کا بیسمنٹ اور گراؤنڈ فلور کلیئر ہے جبکہ میزنائن فلور کی آگ کنٹرول میں ہے، فلور کا جائزہ لیا ہے۔

فائر آفیسر نے کہا کہ میزنائن فلور پر بڑی تعداد میں کپڑا موجود ہے، میزنائن فلور کو مشینری سے توڑا گیا ہے۔

انہوں نے مزید کہا کہ آگ بجھانے کے لئے فوم اور پانی کے ساتھ کیمیکل بھی استعمال کیا جارہا ہے، آگ پر مکمل قابو پانے کے بعد کولنگ کا عمل شروع کیا جائے گا۔ 

کراچی میں جیل چورنگی کے قریب بدھ کو دن گیارہ بجے لگنے والی آگ تاحال بجھائی نہ جاسکی۔ 

چوتھے دن بھی فائر بریگیڈ عملے کی سر توڑ کوششیں جاری ہیں۔ نیوی اور رینجرز کی ٹیمیں بھی امدادی کاموں میں شریک ہیں۔

رپورٹس کے مطابق پہلی منزل پر رکھے سامان میں لگی آگ بجھانے کے لئے دیوار توڑ دی گئی ہے۔

گزشتہ روز واٹر بورڈ کے مینجنگ ڈائریکٹر (ایم ڈی) کا کہنا تھا کہ اب تک 10 لاکھ گیلن سے زائد پانی فراہم کیا گیا ہے، آگ پر قابو پانے تک فائر بریگیڈ کو بلامعاوضہ پانی کی فراہمی جاری رہے گی۔

دوسری جانب آتشزدگی کے واقعے کے بعد کمشنر کراچی نے متعلقہ افسران کو شہر بھر میں قائم شاپنگ مالز اور ہائی رائز بلڈنگز کی انسپیکشن کرنے کی ہدایت کردی ہے۔

فائر بریگیڈ حکام کا کہنا ہے کہ جمع ہونے والا پانی نکالنے کے بعد بیسمنٹ کا معائنہ کیا جائےگا۔

واضح رہے کہ آتشزدگی کے واقعے میں ایک شخص جاں بحق ہوچکا ہے جبکہ امدادی کاموں میں مصروف کئی اہلکاروں کی حالت بھی غیر ہوگئی تھی۔

بشکریہ جنگ