کالعدم جماعت کے مطالبات پارلیمنٹ میں لے کر جائیں گے، شیخ رشید

وفاقی وزیر داخلہ شیخ رشید احمد کا کہنا ہے کہ کالعدم جماعت کے ساتھ مذاکرات بہت اچھے رہے ہیں، کالعدم  جماعت کے مطالبات پارلیمنٹ میں لے کر جائیں گے۔

انہوں نے کہا کہ جو کالعدم ٹی ایل پی سے وعدے کئے ہیں ان کا پہرہ دیں گے ، میری خواہش ہے کہ کالعدم ٹی ایل پی سے جو معاملات ہیں وہ طے ہوجائیں۔

وفاقی وزیر داخلہ شیخ رشید احمد کا کہنا ہے کہ گزشتہ روز بھارت کے ساتھ میچ عام کرکٹ میچ نہیں کرکٹ پلس تھا، اختیار ہوتا تو آج عام تعطیل کا اعلان کر دیتا۔

شیخ رشید نے کہا کہ میں نے درخواست کی تھی کہ یہ مذاکرات پنجاب حکومت کا کام ہے، ٹی ایل پی نے ایک روڈ کھول دیا ہے۔

وزیر داخلہ نے کہا کہ وزیر اعظم کے آنے کے بعد یہ معاملات بدھ کو کابینہ میں رکھ دیں گے، کالعدم ٹی ایل پی چاہتی ہے کہ ان کے مطالبات جلد ازجلد پارلیمنٹ کی کمیٹی میں بھیجے جائیں۔

بشکریہ جنگ