ڈیزل کے بجائے ہائیڈروجن سے چلنے والی ٹرینیں متعارف

پائیدار مستقبل کو یقینی بنانے میں آلودگی سے پاک سفر کے طریقے انتہائی اہمیت رکھتے ہیں اور اسی مقصد سے ہائیڈروجن سے چلنے والی دنیا کی پہلی مسافر ٹرین نے کام شروع کر دیا۔

جرمنی کی ریاست لوئر سیکسونی (Lower Saxony) میں آج سے ایک پوری ریل لائن پر یہی ہائیڈروجن ٹرینیں چلیں گی۔

غیر ملکی میڈیا کے مطابق رواں سال کے اختتام تک اس ریلوے لائن پر چلنے والی تمام 15 ڈیزل ٹرینوں کی جگہ انہیں ماحول دوست ہائیڈروجن ٹرینوں کو بتدریج لایا جائے گا۔

ان ٹرینوں کی خاص بات یہ ہے کہ ان سے آلودہ گیسز کا اخراج نہیں ہوتا اور ان کے چلنے کی آواز بھی انتہائی کم ہوتی ہے۔

یہ ٹرینیں ہائیڈروجن کے صرف ایک ٹینک پر ایک ہزار کلومیٹر کی مسافت طے کرسکتی ہیں اور ان ٹرینوں کی حد رفتار 140 کلومیٹر فی گھنٹہ ہے۔

یہاں دلچسپ بات یہ ہے کہ ان ٹرینوں کے استعمال سے ڈیزل کی بھی بچت کی جاسکتی ہے جہاں ساڑھے 4 لٹر ڈیزل کا کام ایک کلو ہائیڈروجن سے لیا جا سکتا ہے۔

بشکریہ جنگ