چیئرمین PTI پر فرد جرم ہائیکورٹ میں چیلنج کرینگے: عمر نیازی

چیئرمین پی ٹی آئی کے ترجمان عمیر نیازی کا کہنا ہے کہ چیئرمین پی ٹی آئی نے صحت جرم سے انکار کیا ہے، فرد جرم کے آرڈر کو ہائی کورٹ میں چیلنج کریں گے۔

عمیر نیازی نے اڈیالہ جیل کے باہر میڈیا سے گفتگو کے دوران سائفر کیس سے متعلق ہونے والی آج کی سماعت کا احوال سناتے ہوئے بتایا ہے کہ چیئرمین پی ٹی آئی نے عدالت سے پوچھا میرے خلاف کیا الزام ہے۔

انہوں نے بتایا کہ چیئرمین پی ٹی آئی نے عدالت میں کہا کہ سازش میرے خلاف ہوئی، میری حکومت گئی، جس میٹنگ کا ذکر کیا گیا اس کے منٹس بھی موجود نہیں، جس سائفر کا ذکر کیا گیا وہ سرے سے کاغذات میں موجود ہی نہیں۔

عمیر نیازی کے مطابق سماعت کے دوران چیئرمین پی ٹی آئی نے کہا کہ لندن پلان کا پہلے سے علم تھا، یہ پلان پی ٹی آئی کو بلڈوز کرنے کے لیے بنایا گیا تھا۔

ان کا کہنا ہے کہ نے چیئرمین پی ٹی آئی نے عام انتخابات اور نواز شریف سے متعلق بات کرتے ہوئے کہا کہ نواز شریف امپائر کو ملا کر کھیلتے ہیں، نواز شریف اس وقت تک الیکشن میں نہیں آسکتے جب تک مرضی کے امپائر نہ ہوں۔

ترجمان نے بتایا کہ چیئرمین پی ٹی آئی نے نواز شریف کے جلسے پر ردِ عمل کا اظہار کرتے ہوئے کہا ہے کہ 14 ہزار سرکاری پولیس اہلکار جلسہ گاہ کو بھرنے گئے، جبکہ پی ٹی آئی کی کارنر میٹنگ تک نہیں ہونے دی، اگر بڑے چور کو چھوڑنا ہے تو اڈیالہ جیل میں قید ملزمان کو بھی چھوڑ دیں۔

عمیر نیازی نے مزید کہا کہ 71 سالہ چیئرمین اسپورٹس مین ہیں، جن کی ایکسر سائز کی درخواست منظور ہو چکی ہے، سیکشن 241 کا اطلاق ہوتا ہے، اس کے اعتراضات ہم نے بتا دیے ہیں۔

انہوں نے یہ بھی کہا ہے کہ مان لیا وزیرِ اعظم کی سائفر کی کاپی نہیں، صدر کو بھی گئی تھی وہ لگا دیں۔

بشکریہ جنگ