چیئرمین PTI خود کہتے تھے جیل میں ایک کلاس ہونی چاہیے، رانا ثناء اللّٰہ

وفاقی وزیر داخلہ رانا ثناء اللّٰہ نے کہا ہے کہ چیئرمین پی ٹی آئی خود کہتے رہے ہیں کہ جیل میں ایک ہی کلاس ہونی چاہیے، جیل میں اوپن واش روم ہی ہوتے ہیں، جن سیلوں میں ہم قید رہے وہ بھی ایسے ہی تھے۔

اپنے بیان میں انہوں نے کہا کہ سابق وزیراعظم کو بی کلاس کا حق حاصل ہے لیکن اس کے لیے انہیں جیل سپرنٹنڈنٹ یا عدالت کو درخواست دینی ہوگی۔

رانا ثناء اللّٰہ کا مزید کہنا تھا کہ درخواست دینے پر اس کے جلد آرڈر ہوجائیں گے اور انہیں بی کلاس کی سہولت مل جائے گی۔

وکیل نعیم حیدر نے کہا کہ ہائیکورٹ اورسپریم کورٹ کے وکالت نامے پر دستخط کروادیے ہیں کل پٹیشن دائر کریں گے۔

وفاقی وزیر نے کہا کہ ٹرائل جج نے چیئرمین پی ٹی آئی کو بہت ریلیف دیا، انہیں دفاع میں گواہ پیش کرنے کا تیرہ مرتبہ موقع دیا۔

رانا ثناء اللّٰہ نے کہا کہ ان کا کیس بھی عمر قید یا سزائے موت کا نہیں، انہیں تین سال قید کی سزا ہوئی ہے، ہفتے دس دن میں ضمانت ہوجائے گی مگر تین سال کی سزا اور نااہلی برقرار رہے گی۔

بشکریہ جنگ