چیئرمین پی ٹی آئی کیخلاف سربراہ جے آئی ٹی کو دھمکانے کا روزنامچہ درج

لاہور میں تحریکِ انصاف کے چیئرمین پر پیشی کے دوران جے آئی ٹی کے سربراہ اور ممبران کو دھمکانے کا روزنامچہ درج کر لیا گیا۔

پولیس کے مطابق روزنامچہ انچارج انویسٹی گیشن قلعہ گجر سنگھ محمد سرور کی مدعیت میں درج کیا گیا ہے۔

روزنامچے کے مطابق چیئرمین پی ٹی آئی کو تھانہ سرور روڈ میں تفتیش کے لیے بلایا گیا تھا جہاں انہوں نے جے آئی ٹی کے سربراہ اور دیگر ممبران کو دھمکایا۔

اس معاملے سے متعلق روزنامچے میں درج کیا گیا ہے کہ چیئرمین پی ٹی آئی نے انگلی سے اشارہ کرتے ہوئے دھمکی دی کہ آپ سب سن لیں آپ نے نہیں رہنا، اگلی حکومت پی ٹی آئی کی آنی ہے۔

روزنامچے کے مطابق ملزم کا یہ عمل قانون اور ضابطے کی خلاف ورزی ہے، تفتیش کے دوران کسی بھی ملزم کا افسر کو ڈرانا آزادانہ اور غیر جانبدار تفتیش کو روکنا ہے۔

واضح رہے کہ چیئرمین پی ٹی آئی پر لاہور کے تھانہ قلعہ گجر سنگھ کی حدود میں جے آئی ٹی کے سربراہ اور ممبران کو دھمکیاں دینے کا الزام ہے۔

بشکریہ جنگ