چیئرمین پی ٹی آئی کو ایئر کولر، چارپائی اور چھت والا پنکھا دیا جا چکا، ترجمان جیل خانہ جات

ترجمان محکمہ جیل خانہ جات کا کہنا ہے کہ چیئرمین پاکستان تحریک انصاف (پی ٹی آئی) کو سیکیورٹی وجوہات پر جیل میں علیحدہ پورشن میں رکھا گیا ہے، قانون کے مطابق ایئر کولر، چارپائی اور چھت والا پنکھا دیا جا چکا ہے۔

توشہ خانہ کیس میں قید چیئرمین پی ٹی آئی کو جیل میں دی گئی سہولتوں سے متعلق  ترجمان محکمہ جیل خانہ جات نے بتا دیا۔

چیف جسٹس اسلام آباد ہائیکورٹ نے اٹک جیل سے اڈیالہ جیل منتقلی کی درخواست پر تحریری حکم جاری کر دیا۔

انہوں نے کہا کہ چیئرمین پی ٹی آئی کو بیڈ میٹرس، تکیہ، ٹیبل اور دو کرسیاں بھی دی گئی ہیں، جیل اور بیرک کی صفائی ستھرائی کا مکمل انتظام کیا گیا ہے۔

ترجمان محکمہ جیل خانہ جات کا کہنا ہے کہ چیئرمین پی ٹی آئی کو ضروری طبی سہولیات بھی فراہم کی گئی ہیں، جیل مینوئل کے مطابق ڈاکٹرز کی نگرانی میں چیئرمین پی ٹی آئی کو خوراک مہیا کی جا رہی ہے۔

ترجمان نے یہ بھی کہا کہ  وکیل اور فیملی کو جیل مینوئل کے مطابق ملاقات کی سہولت بھی حاصل ہے۔

بشکریہ جنگ