چوری شدہ سائیکلوں کا اتنا بڑا ذخیرہ کہ گوگل میپ سے بھی دکھائی دینے لگا

انگلینڈ میں ایک شخص نے چوری کر کے اتنی سائیکلیں جمع کرلیں کہ اس کے لیے انہیں چھپانا بھی مشکل ہوگیا اور یہ گوگل میپ میں بھی آسانی سے دکھائی دینے لگیں۔ 

انگلینڈ کی کاؤنٹی آکسفورڈ شائر میں پولیس اس شخص کے خلاف 500 سے زائد چوری شدہ سائیکلوں کی تحقیقات کر رہی ہیں۔ 

ان سائیکلوں کے بارے میں بتایا گیا کہ وہ اس شخص کے گھر کے بیک یارڈ میں رکھی ہوئی ہیں۔ 

میڈیا رپورٹس کے مطابق ایک 54 سالہ شخص کو اس وقت گرفتار کیا گیا جب اس کے خلاف یہ شکایت موصول ہوئی کہ اس کے گھر کے عقبی حصے میں سائیکلوں کا ڈھیر موجود ہے جو چوہوں کا مسکن بن چکا اور یہ آس پاس کے لوگوں کے لیے بھی پریشان کن ہوچکا ہے۔ 

جب حکام اس شکایت پر کارروائی کے لیے مذکورہ شخص کے گھر پہنچے تو انہوں نے سوچا کہ شاید یہ چند سائیکلیں ہوں گی لیکن ایسا نہیں تھا، یہ چند درجن نہیں بلکہ 500 کے قریب تھی جن کا ایک ڈھیر لگا ہوا تھا۔ 

حکام نے بتایا کہ یہ سائیکلیں انہوں نے 5 سال کے عرصے میں جمع کیں اور یہ اتنی زیادہ تھیں کہ گوگل کی پروڈکٹ گوگل ارتھ کے ذریعے بھی باآسانی دیکھائی دینے لگیں تھیں۔

بشکریہ جنگ