نیدرلینڈز میں ایک چار سالہ بچے نے چُپ کے سے اپنی والدہ کی کار چلا لی جس کے بعد پولیس نے طنز کرتے ہوئے کہا کہ انھیں فارمولا ون کا نیا ڈرائیور مل گیا ہے۔

ملک کے شہر یوتریخت کی پولیس کا کہنا ہے کہ اس بچے کے ساتھ سنیچر کو ایک حادثہ پیش آیا جس میں اس نے دو کھڑی گاڑیوں کو اپنی کار سے ٹکر ماری۔ اس کے بعد وہ ننگے پاؤں جائے وقوعہ سے چلا گیا۔

عینی شاہدین نے واقعے کی اطلاع پولیس کو دی اور بتایا کہ سرد موسم کے باوجود انھوں نے ایک بچے کو وہاں سے جاتے دیکھا ہے۔ پولیس نے انسٹاگرام پر بتایا کہ اس واقعے میں کوئی بڑا نقصان نہیں ہوا اور انھیں ایک نیا ریس کار ڈرائیور مل گیا ہے۔

پولیس کے مطابق سنیچر کی صبح یہ بچہ اس وقت نیند سے بیدار ہوا جب اس کے والد کام کے لیے نکل رہے تھے۔ اس نے اپنی والدہ کی کار کی چابیاں لیں اور ’ڈرائیو پر چلا گیا۔‘

جب پولیس افسران کو اطلاع ملی تو وہ جائے حادثہ پر پہنچے جہاں وہ اس گاڑی کو چھوڑ کر جا چکا تھا۔ اس کا دو گاڑیوں سے تصادم ہوا تھا۔

یہ کار اس کی والدہ کے نام پر رجسٹرڈ تھی تو پولیس نے انھیں فون ملایا۔ پولیس نے بتایا کہ جب بچے سے پوچھا گیا تو اس نے اپنا ڈرائیونگ کا انداز بتاتے ہوئے سٹیئرنگ ویل گھما کر دکھایا۔

اس پوسٹ میں بتایا گیا کہ ’ہمیں اس وقت احساس ہوا کہ یہی بچہ ڈرائیور ہوسکتا ہے۔‘

اس چار سالہ بچے کو پولیس سٹیشن میں بٹھا کر ہاٹ چاکلیٹ پلائی گئی اور ایک ٹیڈی بیئر دیا گیا جس کے بعد ان کی والدہ وہاں پہنچ گئیں۔

یہ سب لوگ جائے وقوعہ پر پہنچے جہاں بچے سے کہا گیا کہ وہ بتائے گاڑی کیسے چلتی ہے۔

یہ بھی پڑھیے

غزہ کی پٹی میں خوبصورتی، محبت اور جنگ کی دیوی کا مجسمہ دریافت

برطانوی خاتون نے لاٹری جیت کر 60 ملین پاؤنڈ کیوں بانٹ دیے؟

زمین میں چھپا وہ خزانہ جس کے لیے مستقبل میں جنگیں ہو سکتی ہیں

صدر پوتن کی مبینہ گرل فرینڈ جن کو روس کی ’خفیہ خاتون اول‘ کہا جاتا ہے

پولیس کے مطابق اس بچے نے، جسے اس کی ماں نے ذہین کہا تھا، چابی سے کار کا دروازہ کھولا اور اسے لگا کر گاڑی سٹارٹ کر دی۔ پھر اس نے کلچ اور ریس پر پاؤں دبایا۔

پولیس افسران نے والدین سے گزارش کی کہ آئندہ اپنی کار کی چابیاں چھپا کر رکھیں۔

اس نے سوشل میڈیا پر مزاحیہ پوسٹ میں لکھا کہ یہ بچہ نیا میکس ویسٹاپن ہے۔ اس نے کہا کہ ’اچھا ہوا کہ اس چھوٹے ڈرائیور کا سفر اس جھٹکے کے بعد اختتام پذیر ہوا۔‘