’چائے کو بخش دو‘ ٹوئٹر پر ٹرینڈ بن گیا

وفاقی وزیر برائے منصوبہ بندی، احسن اقبال کا عوام کو چائے کم پینے کا مشورہ دینا ہی تھا کہ عوام کی جانب سے ناصرف اس مشورے کو قبول کرنے سے انکار کر دیا گیا بلکہ اس پر میمز کا سلسلہ بھی جاری ہے۔

پاکستان میں اس وقت مائیکرو بلاگنگ ویب سائٹ ٹوئٹر پر تیسرے نمبر پر ’چائے کو بخش دو‘ ٹرینڈ کر رہا ہے، تاحال اس پر 1 ہزار 359 افراد ٹوئٹ کر چکے ہیں جن کی تعداد وقت کے ساتھ بڑھتی جا رہی ہے۔

چائے کے شوقین افراد کا اس ٹرینڈنگ میں اپنا حصہ ڈالتے ہوئے چائے کم کرنے کے مشورے پر ناراضی کا اظہار کیا جا رہا ہے۔

ٹوئٹر پر راحت اسامہ نامی صارف کا لکھنا ہے کہ ’ہاں بالکل، چائے  ہماری واحد وفادار ساتھی ہے جو ہمیں ہمیشہ برے حالات میں پرسکون کرتی ہے اور یہ ہمارے دوستوں کے درمیان ایک مضبوط تعلق کا سبب بھی ہے۔‘

دوسری جانب ایک صارف نے لکھا کہ ’اس سے پہلے چائے پر پابندی لگ جائے چائے کی بالٹی بھر بھر کر پئیں گے‘۔

شیراز نامی ایک صارف نے لکھا کہ ’ چائے پر کوئی سمجھوتہ نہیں ہے‘۔

کچھ صارفین کی جانب سے تو اپنے خون کا گروپ ’ٹی‘ یعنی چائے کو قرار دیا گیا ہے۔

علی نامی صارف نے اس ٹرینڈ میں حصہ ڈالتے ہوئے لکھا ہے کہ ’میں نے آج شام کی چائے نہیں پی، معیشت کچھ بہتر ہوئی یا نہیں‘۔

دوسری جانب علی رحمٰن کی جانب سے خدشہ ظاہر کیا گیا کہ ’میں نے آج 4 کپ چائے پی لی ہے، معیشت کہیں کمزور تو نہیں ہو گئی ہے‘۔

ایک جانب حکومت کفایت شعاری کا درس دے رہی ہے تو دوسری جانب عوام سمیت فنکار بھی اِن مشوروں سے نالاں نظر آ رہے ہیں۔

واضح رہے کہ میڈیا سے گفتگو کرتے ہوئے احسن اقبال کا کہنا تھا کہ ʼقوم چائے کے ایک یا دو کپ کم کریں کیونکہ ہم جو چائے درآمد کرتے ہیں وہ بھی ادھار لے کر کرتے ہیں، اگر تیل مہنگا ہوتا ہے تو ہمیں اس کے استعمال کو کم کرنا ہوگا تاکہ ملک پر کم سے کم بوجھ پڑے‘۔

بشکریہ جنگ