پی ڈی ایم کے کارکنان ریڈزون میں داخل،سپریم کورٹ کے باہر پہنچ گئے

اسلام آباد:پی ڈی ایم کے زیر اہتمام دھرنا دینے کے لئے حکومتی اتحاد میں شامل جماعتوں کے کارکنان وفاقی دارالحکومت کے ریڈزون میں داخل ہوکر سپریم کورٹ کے باہر پہنچ گئے۔

پی ڈی ایم جماعتوں کے کارکن گیٹ پھلانگ کر ریڈزون میں داخل ہوئے اور نعرے لگاتے ہوئے عدالت عظمیٰ کے باہر پہنچے، جہاں ایف سی اور پولیس اہلکاروں نے انہیں روکنے کی کوشش کی۔

پولیس حکام کی جانب سے مظاہرین سے مذاکرات کی کوشش کی گئی۔سپریم کورٹ کے باہر احتجاج کے لیے آنے والے کارکنوں کو روکنے کے لیے پولیس اور ایف سی کی بھاری نفری پہلے ہی الرٹ کردی گئی تھی جبکہ صورت حال کو دیکھتے ہوئے شاہراہ دستور کو بھی عارضی طور پر ٹریفک کے لیے بند کردیا گیا ہے۔

ترجمان اسلام آباد کیپٹل پولیس کی جانب سے پی ڈی ایم جماعتوں کے کارکنوں کے ریڈزون میں داخلے کی تصدیق کردی گئی ہے۔ سپریم کورٹ کے گیٹ پر پہنچنے والے کارکنان نے نعرے بازی کی۔ پولیس نے مظاہرین سے پرامن رہنے کی اپیل کرتے ہوئے کہا کہ دہشت گردی کے خدشات موجود ہیں، لہذا عوام سے گزارش ہے کہ اجتماع والے مقامات سے دور رہیں۔

ترجمان نے عوام سے تعاون کی درخواست بھی کی ہے۔ احتجاج کے دوران مظاہرین نے عمران خان کے خلاف نعرے بازی کی ۔