پی ٹی آئی کی ارکان کو استعفوں کی تصدیق کے عمل میں شامل نہ ہونے کی ہدایت

پی ٹی آئی قیادت نے اپنےارکان قومی اسمبلی کو استعفوں کی تصدیق کے عمل میں شامل نہ ہونےکی ہدایت کردی۔

ذرائع کے مطابق پارٹی کی جانب سے ہدایت کی گئی ہے کہ تحریک انصاف کے ارکان اسمبلی اسپیکر سے ملاقات کے لئے نہ جائیں۔

پارٹی نے ارکان کو ہدایت دیتے ہوئے کہا ہے کہ ہم استعفیٰ دے چکے ہیں،مزید کسی اقدام کی ضرورت نہیں۔

واضح رہے کہ اسپیکر قومی اسمبلی راجہ پرویز اشرف نے پاکستان تحریک انصاف کے مستعفی اراکین کو ان کے استعفوں کی تصدیق کے لئے 6 سے 10 جون تک طلب کیا ہے ، ہر رکن سےانفرادی طور پر استعفے کی تصدیق کی جائے گی ۔

قومی اسمبلی سیکرٹریٹ کی جانب سے مستعفی اراکین کو مراسلے جاری کردیئے گئے ہیں، کُل مستعفی اراکین کی تعداد 131 ہے۔

روزانہ کی بنیاد پر 30 مستعفی اراکین اسپیکر قومی اسمبلی سے ملاقات کریں گے ۔ 

ہر رکن کے لیے 5 منٹ کا وقت مقرر کیا گیا ہے ۔

اسپیکر قومی اسمبلی نے مستعفی اراکین کو قومی اسمبلی کے قواعد و ضوابط کے طریقہ کار 2007 کے قاعدہ 43(2)(بی) کے تحت حاصل اختیارات کو بروئے کار لاتے ہوئے کیا ہے۔

بشکریہ جنگ