پی ٹی آئی کا وتیرہ ہے ہارنے پر الزام لگاتے ہیں، عبدالحکیم بلوچ

پیپلز پارٹی کے سینئر رہنما اور این اے 237 کے کامیاب امیدوار عبدالحکیم بلوچ نے کہا ہے کہ تحریک انصاف کا وتیرہ ہے کہ ہار جانے پر الزام لگاتے ہیں۔

جیو نیوز کے پروگرام کیپٹل ٹاک میں گفتگو کے دوران عبدالحکیم بلوچ نے کہا کہ این اے 237 کے ضمنی الیکشن میں اتنے ہی ووٹ ملے جتنے 2018ء میں ملے تھے لیکن پی ٹی آئی کا ووٹ بینک کم ہوا۔

انہوں نے کہا کہ حلقے میں ہمارے مرکزی اور صوبائی لیڈر نہیں تھے جبکہ الیکشن والے دن تحریک انصاف والے جتھے لےکر گھوم رہے تھے۔

پی پی رہنما نے مزید کہا کہ بلال غفار نے ہمارے کیمپ میں لوگوں سےگالم گلوچ کی، انہیں کسی نے مارا نہیں، چوٹیں گرنے کی وجہ سے آئیں۔

ان کا دعویٰ سے کہنا تھا کہ کراچی میں بلدیاتی الیکشن لڑیں گے بھی اور میئر بھی لائیں گے۔

عبدالحکیم بلوچ نے یہ بھی کہا کہ کراچی میں بڑے پولنگ اسٹیشن ہیں، زیادہ پولیس کی ضرورت ہوتی ہے، صوبائی فورس سیلاب سے متاثرہ علاقوں میں لگی ہوئی ہے۔

بشکریہ جنگ