پی ٹی آئی ایم پی اے کی گن مینوں کے ہمراہ لیڈی ریڈنگ اسپتال آمد

پاکستان تحریک انصاف (پی ٹی آئی) کے رکن خیبرپختونخوا اسمبلی آصف خان نے لیڈی ریڈنگ اسپتال کے قوائد ضوابط کی خلاف ورزی کی۔

ایم پی اے آصف خان گن مینوں کے ہمراہ لیڈی ریڈنگ اسپتال آ گئے، وہ نگہداشت وارڈ میں بھی گن مینوں کے ہمراہ گئے۔

ترجمان اسپتال محمد عاصم کا کہنا ہے کہ ایل ار ایچ اور خصوصاً نگہداشت وارڈ میں اسلحہ لے جانا منع ہے، متعلقہ ایم پی اے کے ساتھ تعاون کیا اور ان کے خلاف کارروائی نہیں کی۔

وزیر صحت خیبرپختونخوا تیمور سلیم جھگڑا کا کہنا ہے کہ رکن اسمبلی کا گن مین عیادت کے وقت ویڈیو بنا رہا تھا جو پالیسی کے خلاف ہے۔

تیمور سلیم جھگڑا نے کہا کہ گن مین نے آئی سی یو میں ٹیکنیشن اور ڈاکٹروں کو دھکے بھی دیے۔

پی ٹی آئی کے ایم پی اے آصف خان نے کہا کہ مریض کی عیادت پر آئی سی یو کے ٹیکنیشن نے میرے ساتھ بدتمیزی کی۔

آصف خان کا کہنا ہے کہ محکمۂ صحت کو ٹوئٹس کے ذریعے چلایا جا رہا ہے، صوبائی وزیر کو اس سے متعلق آگاہ بھی کیا لیکن شنوائی نہ ہوسکی۔

بشکریہ جنگ