پی ٹی آئی یورپ کی تنظیمیں 18 مارچ کو یورپی پارلیمنٹ کے سامنے احتجاجی مظاہرہ کریں گی

یورپ بھر میں تحریک انصاف کی تنظیمیں 18 مارچ کو یورپی پارلیمنٹ کے سامنے ایک بڑا احتجاجی مظاہرہ کریں گی جس میں پارٹی چیئرمین عمران خان ویڈیو لنک کے ذریعے خطاب کریں گے۔

اس بات کا اعلان تحریک انصاف بیلجیئم کے صدر غلام ربانی بابو نے یہاں برسلز میں کیا۔

نمائندہ جنگ سے گفتگو کرتے ہوئے انہوں نے بتایا کہ تحریک انصاف بیلجیئم کی میزبانی میں فرانس، جرمنی، ہالینڈ، اسپین، برطانیہ، پرتگال، ڈنمارک، ناروے، لکسمبرگ، اٹلی، آسٹریا، سویڈن اور آئرلینڈ سے پاکستان تحریک انصاف (پی ٹی آئی) کی تنظیمیں پاکستان میں پاکستان ڈیموکریٹ موومنٹ (پی ڈی ایم) کی حکومت کی جانب سے پارٹی کی اعلیٰ قیادت کے خلاف روزانہ کی بنیاد پر درج ہوتے دہشتگردی کے مقدمات اور ان کی جانب سے آئین سے انحراف کرتے ہوئے الیکشن سے فرار کےلیے مختلف حربے اختیار کرنے پر اپنی ناپسندیدگی کے اظہار کےلیے ایک بڑا مظاہرہ کرنے جا رہی ہیں۔

یہ مظاہرہ 18 مارچ کو دوپہر 2 بجے یورپی پارلیمنٹ کے سامنے پلس لکسمبرگ پر منعقد ہوگا۔

احتجاجی مظاہرے میں امریکا، کینیڈا اور جنوبی افریقہ سے بھی وفود شرکت کریں گے۔

انہوں نے مزید کہا کہ اوورسیز پاکستانی موجودہ حکومت کی جانب سے ان کے ووٹ دینے کے حق کو واپس لینے کو کبھی نہیں بھولیں گے۔

ان کا کہنا تھا کہ اس عمل کے ذریعے اوورسیز پاکستانیوں کو پاکستان کے جمہوری عمل میں شرکت کے حق سے محروم کیا گیا ہے۔

بشکریہ جنگ