پی ایس ایل7: الیکس ہیلز اسلام آباد یونائیٹڈ کی ٹیم سے الگ تھلگ کردیے گئے

پاکستان سپر لیگ (پی ایس ایل) 7 میں اسلام آباد یونائیٹڈ کی نمائندگی کر رہے انگلش کرکٹر الیکس ہیلز ٹیم سے آئیسولیٹ کردیے گئے۔

پی ایس ایل 7 کے پلے آف مرحلے میں ایلکس ہیلز کی واپسی اسلام آباد یونائیٹڈ کے لیے بڑی خبر ہے، تاہم ٹیم ببل سے علیحدگی کے باعث اب انہیں کچھ مشکلات کا سامنا ہے۔

ترجمان پاکستان کرکٹ بورڈ (پی سی بی) کے مطابق ایلکس ہیلز پلے آف اور فائنل کے لیے اسلام آباد یونائیٹڈ کو دستیاب ہیں لیکن وہ ٹیم سے الگ تھلگ رہیں گے۔

پی سی بی ترجمان کے مطابق ایلکس ہیلز کھلاڑیوں کے ببل سے علیحدہ ہوئے تھے، اس لیے اب وہ ٹیم کے ساتھ سفر بھی نہیں کریں گے۔

ترجمان کے مطابق ایلکس ہیلز کو ٹیم کا ڈگ آؤٹ استعمال کرنے کی بھی اجازت نہیں ہوگی اور نہ ہی وہ دیگر کھلاڑیوں کے ساتھ گھل مل سکیں گے۔

پی سی بی ترجمان کے مطابق اسلام آباد یونائیٹڈ میں شامل ایلکس ہیلز پر ٹیم کے ساتھ ٹریننگ کرنے پر بھی پابندی عائد ہوگی۔

بشکریہ جنگ