پیٹرول کی قیمتوں میں اضافہ، پی پی کے سینیٹر سائیکل پر پارلیمنٹ پہنچے

وفاقی حکومت کی جانب سے عوام پر پیٹرول بم گرانے کے بعد پیپلز پارٹی کے سینیٹر بھی مہنگائی کے خلاف احتجاج میں حصہ لیتے ہوئے سائیکل پر پارلیمنٹ پہنچے۔

پیپلز پارٹی کے سینیٹر بہرمند خان تنگی نے پیٹرول کی قیمتوں میں بڑے اضافے کے بعد سائیکل پر پارلیمنٹ ہاؤس پہنچنے کا فیصلہ کیا۔

سینیٹر بہرمند خان تنگی کی سوشل میڈیا پر گردش کرنے والی ویڈیو میں دیکھا جاسکتا ہے کہ انہیں سائیکل چلانے میں دشواری ہورہی ہے جس کے باعث ایک شخص سائیکل چلانے میں ان کی مدد کررہا ہے۔

خیال رہے کہ وفاقی حکومت نے پیٹرول کی قیمت میں مزید 8 روپے 3 پیسے فی لیٹر اضافہ کردیا۔

رپورٹس کے مطابق پیٹرول کی نئی قیمت 145روپے 82 پیسے ہوگئی ہے، اسی طرح ہائی اسپیڈ ڈیزل کی قیمت میں 8 روپے 14 پیسے فی لیٹر اضافہ کیا گیا ہے۔

شہباز گِل نے پیٹرول اور ڈیزل کی قیمت میں اضافے کے بعد ٹوئٹر پر ایک بیان جاری کیا۔

مٹی کے تیل کی قیمت 6 روپے 27 پیسے اضافے سے 116روپے 53 پیسے کردی گئی ہے۔

واضح رہے کہ اس سے قبل 16 اکتوبر 2021 ء کو حکومت نے ڈیزل کی قیمت میں 12 روپے 44 پیسے، پیٹرول میں 10 روپے 49 پیسے اور مٹی کے تیل کی قیمت میں دس روپے 95 پیسے فی لیٹر اضافہ کیا تھا۔

بشکریہ جنگ