پہلا ٹی ٹوئنٹی: پاکستان کا انگلینڈ کو 159 رنز کا ہدف

پاکستان نے پہلے ٹی ٹوئنٹی میچ میں انگلینڈ کو جیت کے لیے 159 رنز کا ہدف دے دیا۔ 

کراچی کے نیشنل اسٹیڈیم میں کھیلے جارہے اس میچ میں انگلینڈ نے ٹاس جیت کر پاکستان کو پہلے بیٹنگ کرنے کی دعوت دی تھی۔ 

کپتان بابر اعظم اور محمد رضوان نے ٹیم کو جارحانہ آغاز فراہم کیا اور چھٹے اوور میں ہی ٹیم کی نصف سنچری مکمل کرلی تھی۔

پاکستان ٹیم کو دسویں اوور میں بابر اعظم کی صورت میں پہلا نقصان اٹھانا پڑا۔ قومی ٹیم کے کپتان 85 کے مجموعے پر 31 رنز بنا کر آؤٹ ہوئے۔ 

کریز پر موجود محمد رضوان نے حیدر علی کے ساتھ ٹیم کا اسکور 109 تک پہنچایا جہاں حیدر 11 رنز بنا کر آؤٹ ہوگئے۔ 

انگلش بولرز کا نپی تلی گیند بازی کا سلسلہ جاری رہا، محمد رضوان 117 کے اسکور پر معین علی کی گیند پر اسٹمپ ہوگئے، انہوں نے 68 رنز کی اننگز کھیلی۔ 

ڈیبیو کرنے والے شان مسعود صرف 7 رنز کے مہمان ثابت ہوئے جبکہ محمد نواز نے 4، خوشدل شاہ نے 5، نسیم شاہ اور عثمان قادر کوئی رن نہ بناسکے۔ 

مڈل آرڈر بیٹسمین افتخار احمد نے 17 گیندوں پر 28 رنز کی اننگز کھیل کر قومی ٹیم کو 159 تک پہنچانے میں اہم کردار ادا کیا۔ 

خیال رہے کہ سیریز کے پہلے ٹی ٹوئنٹی میچ میں جوز بٹلر کی جگہ معین علی انگلینڈ ٹیم کی کپتانی کے فرائض انجام دے رہے ہیں۔

خیال رہے کہ انگلینڈ کی ٹیم 17 سال بعد پاکستان کا دورہ کر رہی ہے جہاں وہ اپنے دورے کے پہلے مرحلے میں 7 ٹی ٹوئنٹی میچز کھیلے گی۔ 

ٹاس کے موقع پر گفتگو کرتے ہوئے معین علی کا کہنا تھا کہ 17 سال بعد پاکستان آ کر کھیلنا خوش آئند ہے۔

انہوں نے یہ بھی کہا کہ ٹیم میں کچھ نئے لڑکے ہیں، ایلکس ہیلز تین سال بعد واپس آئے ہیں۔ 

قومی ٹیم کے کپتان بابر اعظم کا کہنا تھا کہ ٹی ٹوئنٹی ورلڈ کپ قریب ہے، یہ سیریز ہمارے لیے بہت اہم ہے۔

بابر اعظم نے بتایا کہ آج شان مسعود اپنا ٹی ٹوئنٹی انٹرنیشنل کا ڈیبیو کرنے جارہے ہیں۔

پاکستان ٹیم کپتان بابر اعظم، محمد رضوان، حیدر علی، شان مسعود، افتخار احمد، خوشدل شاہ، محمد نواز، عثمان قادر، حارث رؤف، نسیم شاہ اور شاہنواز دہانی پر مشتمل ہے۔ 

انگلش ٹیم کی قیادت معین علی کر رہے ہیں جبکہ دیگر کھلاڑیوں میں فل سالٹ، الیکس ہیلز، ڈاوڈ ملان، بین ڈکیٹ، ہیری بروکس، سین کرن، ڈیوڈ وِلی، عادل رشید، لوک ووڈ اور ریچرڈ گلیسن شامل ہیں۔

بشکریہ جنگ