پہلا ون ڈے: پاکستان کا آسٹریلیا کو 314 رنز کا ہدف دیدیا

آسٹریلیا نے پہلے ون ڈے انٹرنیشنل میں پاکستان کو جیت کے لیے 314 رنز کا ہدف دے دیا۔

قذافی اسٹیڈیم لاہور میں کھیلے جارہے اس میچ میں پاکستان نے ٹاس جیت کر آسٹریلیا کو پہلے بیٹنگ کی دعوت دے دی تھی۔

آسٹریلیا نے پہلے بیٹنگ کرتے ہوئے 6 وکٹوں کے نقصان پر 313 رنز بنائے۔ 

مہمان ٹیم کی جانب سے اوپننگ بلے باز ٹریوس ہیڈ نے شاندار سنچری اسکور کی، جبکہ بین میک ڈرمٹ بھی نصف سنچری بنا کر نمایاں رہے، دونوں نے بالترتیب 101 اور 55 رنز کی اننگز کھیلی۔ 

کینگروز کو بڑے ٹوٹل تک پہنچانے میں کیمرون گرین نے ناقابلِ شکست 40، مارکس اسٹوئنس نے 26، مارنس لبوشین نے 25 اور کپتان ایرون فنچ نے 23 رنز کے ساتھ اپنا حصہ ڈالا۔ 

قومی بولرز متاثر کن کارکردگی نہیں دکھا سکے، جن میں سے حارث رؤف اور زاہد محمود نے 2، 2 جبکہ افتخار احمد اور خوشدل شاہ نے ایک ایک وکٹ لی۔ 

خیال رہے کہ یہ آسٹریلیا کی جانب سے پاکستان کو جیت کے لیے ریکارڈ ہدف ہے۔ 

گرین شرٹس نے کینگروز کے خلاف ون ڈے میں سب سے زیادہ 274 رنز کا ہدف 1987 میں حاصل کیا تھا۔ اس میچ کے مین آف دی میچ آنجہانی ڈین جونز تھے۔

ٹاس کے موقع پر کپتان بابراعظم نے بتایا کہ آج کے میچ میں شاہین شاہ آفریدی کو آرام دیا گیا ہے، جبکہ محمد وسیم اور زاہد محمود آج اپنا ون ڈے ڈیبیو کر رہے ہیں۔

پاکستان ٹیم میں کپتان بابراعظم، امام الحق، محمدرضوان، فخر زمان، سعود شکیل، افتخار احمد، خوشدل شاہ، حسن علی، محمد وسیم جونیئر حارث رؤف اور زاہد محمود شامل ہیں۔

آسٹریلین ٹیم میں کپتان ایرن فنچ، ایلکس کیری، کیمرون گرین، ٹریوس ہیڈ، مارکس اسٹوئنس، شان ایبٹ، نیتھن ایلس، ایڈم زیمپا، مچل سوئپسن، جیسن بیرنڈورف اور بین مکڈرموٹ شامل ہیں۔

میچ سے قبل پی سی بی کی جانب سے جاری بیان میں بتایا گیا تھا کہ گزشتہ روز فاسٹ بولر شاہین آفریدی کے گھٹنے پر گیند لگی تھی، آج ان کا فٹنس ٹیسٹ بھی ہوا تھا، جس کے بعد انہیں آرام دینے کا فیصلہ کیا گیا ہے۔

بشکریہ جنگ