پولیس کو پی ٹی آئی کے دو ایم این ایز کے سندھ ہاؤس پر حملے کے ویڈیو ثبوت مل گئے

وفاقی دارالحکومت اسلام آباد  میں پارلیمنٹ کے سندھ ہاؤس پر پی ٹی آئی کارکنوں کی چڑھائی کے معاملے پر پولیس کو پی ٹی آئی کے دو ایم این ایز کے سندھ ہاؤس پر حملے کے ویڈیو ثبوت مل گئے۔

وفاقی دارالحکومت اسلام آباد میں پی ٹی آئی کے کارکنان لوٹے لے کر سندھ ہاؤس پہنچے اور سندھ ہاؤس کے قریب ریڈ زون میں داخل ہوگئے۔

ویڈیوز میں پی ٹی آئی ایم این ایز عطاء اللّٰہ اور فہیم خان سندھ ہاؤس کا گیٹ توڑ رہے ہیں، ایم این اے عطاءاللّٰہ خود گیٹ پر چڑھ کر اسے گراتے ہوئے گر گئے تھے۔

ایس ایس پی آپریشنز اسلام آباد کا کہنا ہے کہ دونوں ایم این ایز کی ویڈیوز کو ثبوت میں شامل کر دیا گیا ہے۔

شہباز گل نے کہا کہ جو لوگ عمران خان کےنام پر ووٹ لے کر آئے، وہ بکتے ہیں تو عوام ردعمل دیں گے، جو آگ انہوں نے لگائی ہے وہ آگ تو پھیلے گی۔

ایس ایس پی آپریشنز اسلام آباد کے مطابق پولیس دونوں ایم این ایز کے نام ایف آئی آر  میں شامل کر رہی ہے۔

گزشتہ روز پولیس نے 13 پی ٹی آئی کارکنوں کے خلاف ایف آئی آر درج کی تھی، پولیس نے ایف آئی آر میں دونوں ایم این ایز کے نام شامل نہیں کیے تھے۔

واضح رہے کہ گزشتہ روز اسلام آباد میں پی ٹی آئی کارکنوں نے سندھ ہاؤس پر دھاوا بولا تھا اور سندھ ہاؤس کا گیٹ توڑ دیا تھا۔

وفاقی دارالحکومت اسلام آباد میں پی ٹی آئی کے کارکنان لوٹے لے کر سندھ ہاؤس پہنچے اور سندھ ہاؤس کے قریب ریڈ زون میں داخل ہوگئے تھے، جہاں انہوں نے دھرنا دینے کے بعد سندھ ہاؤس پر دھاوا بول دیا تھا۔

بشکریہ جنگ