پنجاب: وزراء گھر گھر کورونا ویکسین مہم کی نگرانی کرینگے

پنجاب کے صوبائی وزراء کو گھر گھر کورونا وائرس کی ویکسین لگانے کی مہم کی نگرانی سونپ دی گئی، جس کا نوٹیفکیشن بھی جاری کر دیا گیا ہے۔

جاری کیئے گئے نوٹیفکیشن کے مطابق صوبائی وزراء اپنے الاٹ شدہ ضلع میں ہفتے میں کم از کم 2 بار دورہ ضرور کریں گے۔

نیشنل کمانڈ اینڈ آپریشن سینٹر (این سی او سی) کے اعداد و شمار کے مطابق پاکستان میں گزشتہ 24 گھنٹوں کے دوران کورونا وائرس کے مزید 659 کیسز سامنے آئے ہیں، مزید 17 افراد اس موذی وباء کے سامنے زندگی کی بازی ہار گئے، اس کے مزید 931 مریض شفایاب ہو گئے، جبکہ مثبت کیسز کی شرح 1 اعشاریہ 46 فیصد پر آ گئی۔

نوٹیفکیشن میں مزید کہا گیا ہے کہ وزراء کورونا وائرس کی گھر گھر ویکسین مہم کے سلسلے میں ڈپٹی کمشنر اور ای ڈی او ہیلتھ سے رابطے میں رہیں۔

جاری کیئے گئے نوٹیفکیشن کے ذریعے یہ ہدایت بھی دی گئی ہے کہ وزراء کورونا وائرس کی گھر گھر ویکسین مہم کے حوالے سے اپنی رپورٹ محکمۂ صحت کو ارسال کریں۔

بشکریہ جنگ